Вести
ПОЖАРИ НИЗ ЦЕЛИОТ БАЛКАН, во Бугарија за еден ден регистрирани 279 пожари, гореше во близина на Атина, Тасос, делови од јужна Србија...
10.07.2025
Во Македонија активни се девет пожари на отворен простор заклучно со седум часот утринава, од вкупно 63 во текот на вчерашниот ден, информира Центарот за управување со кризи (ЦУК). Под контрола се четири пожари, еден е локализиран, а 49 се изгаснати.
ЦУК соопшти дека се активни пожарите во Чучер Сандево – Блаце, каде е зафатена ниска вегетација, во село Визбегово во Шуто Оризари каде гори депонја, во Прилеп – село Бешиште, место викано Бешишки рид, мешана шума. Во пожари во Македонски Брод, се зафатени дабова шума и грмушки, помеѓу селата Црешнево и Локвица, ниска вегетација од пожар проширен од фабрика „Самоков“ во село Рамне, како и мешана шума во селата Слатина и Ковче. Исто така во општина Чашка, под Солунска Глава, кај местото викано Изворите на Бабуна и Бабина Дупка, има чад во карпест дел, а гори и нискостеблеста шума во село Николиќ во Дојран.
Локализиран е пожарот во Кочани, место викано Бабиште, помеѓу селата Јастребник и Полаки, со кој се зафатени ниска вегетација и мешана шума.
Подобрена е ситуацијата во трите пожари што вчера избувнаа во Грција на три различни локации, едниот во близина Атина, што е речиси изгасен, вториот на островот Тасос, а третиот кај Дојранското Eзеро што од селото Николиќ премина на грчка територија, јави дописничката на МИА од Атина.
Кај Дојранското Eзеро на грчка страна, утрово продолжува гаснењето на пожарот, меѓутоа ситуацијата е подобрена, а интервенираат копнени и воздушни противпожарни сили на Грција.
За конкретниот пожар кај селото Николиќ во општина Дојран, како што вчера објави МИА, Грција испрати два противпожарни авиони од типот канадер CL-415 и две противпожарни возила со осум пожарникари, по билатералното барање за помош упатено од ЦУК до Единствениот координативен центар за операции и управување со кризи на Грција.
Шумскиот пожар во Главкади, во северниот дел на островот Тасос, што избувна кусо пред полноќ, се гасне со 62 пожарникари со две пешадиски тима, 20 возила, шест авиони и два хеликоптери, а утрово е значително подобрена состојбата.
Во источниот дел на областа Атика, поширокиот регион на Атина, во близина на Оропос, вчера попладне избувна голем шумски пожар во кој интервенираа над 200 пожарникари, а од рано утрово гаснењето продолжува и со воздушни средства, иако огнените јазици се веќе под контрола.
Бугарската Главната дирекција „Безбедност од пожар и заштита на населението“ (ГДПБЗН) денеска соопшти дека во изминатото деноноќие изгаснати се сите 279 пожари во Бугарија.
Во пожарите нема човечки жртви, но причинета е материјална штета на десетици станбени и помошни објекти, неколку возила изгореа, а од некои места беше евакуирано населението.
Поради пожарите ширум Бугарија на неколку места беше активиран и националниот систем за предупредување „БГ-АЛЕРТ“.
Премиерот на Бугарија, Росен Жељазков ги повика локалните и регионалните власти на преземат мерки за превенција од пожари.
Српската Влада ќе обезбеди три милиони евра за помош на оние кои се најмногу изложени на ризик од пожарите, изјави првиот вицепремиер и министер за финансии Синиша Мали.
Тој рече дека владата донела одлука со која се издвоени дополнителни средства од тековната резерва на буџетот за санација на штетите предизвикани од пожарите што зафатија неколку области во Србија.
„Во изминатите денови, нашата земја беше погодена од катастрофални пожари, што, особено на југот на Србија, зафатија цели села, уништувајќи домови, имоти и се што луѓето граделе со децении. Владата на Република Србија реагираше веднаш - на денешната седница донесовме одлука итно да издвоиме 350 милиони динари, или три милиони евра, од буџетската резерва, за санирање на штетите, помош на најранливите и реконструкција на погодените подрачја. Владата на Република Србија, која денеска го имаше својот прв состанок, а чија задача, меѓу другото, ќе биде собирање податоци за штетите“, наведено е во соопштението на Министерството.
Погодените од пожарите ќе добијат средства за обнова на нивните домаќинства што е можно поскоро, како и за санирање на штетите во земјоделството и сточарството.
Извор МИА
фото freepic