Вести
Густ црн чад се гледа во цело Скопје, пожарот кај Визбегово претставува ризик за станбените куќи, предупредуваат од ЦУК
09.07.2025
Авион „ер трактор“ на Дирекцијата за заштита и спасување е вклучен во гаснењето на пожарот на дивата депонија кај Визбегово. Покрај поддршка од воздух, во гаснењето интервенираат пожарникари од Територијалната противпожарна единица на Град Скопје и возила од „Комунална хигиена“.
Од Центарот за управување со кризи информираат дека пожарот претставува ризик за проширување кон околните површини, а во близина се наоѓаат и станбени куќи.
- Укажано му е на градоначалникот на Шуто Оризари доколку се процени дека има потреба да пристапи кон евакуација на населението кое се наоѓа во тој реон, велат од ЦУК.
Пожарот избувна утрово, а во првичната изјава дадена за МИА командатот на Територијалната противпожарна единица на Град Скопје Звонко Томески информираше дека интервенираат со четири возила.
Густиот чад од пожарот се гледа од неколку страни на градот, а граѓаните споделуваат слики и видео на социјалните мрежи.
Пожарот близу дивата депонија во Визбегово е опасност за жителите во Шуто Оризари и ако има потреба ќе треба да се евакуираат, соопшти Центарот за управување со кризи (ЦУК).
Во моментов се интервенира од екипи на Бригатата за противпожарна заштита (БППЗ) на Град Скопје. Густ црн чад се гледа во цело Скопје, депонијата е на два километри воздушна линија од центарот на градот. Депонијата се запалила утрово и најверојатно горат гуми.
Извор/фото МИА