Вести
ОД ВЧЕРА ПОПЛАДНЕ ГОРИ КАЈ СКОПСКО БЛАЦЕ, се гаси и од хеликоптери, но пожарот не е целосно под контрола
07.07.2025
Пожарот кај скопско Блаце уште не е целосно под контрола, а активни се два краци на чие гаснење се работи, информираше директорот на Дирекцијата за заштита и спасување Стојанче Ангелов. Тој вели дека кај едниот крак е веќе спречено ширење на пламените јазици.
– Рано утрово по 5 часот почнавме со гасење на пожарот на отворен простор кој вчера попладне, 6 јули, изби кај патот на Блаце. Пожарот делумно зафати и шума. Скопската противпожарна бригада утрово започна со гаснење, како помош се придружија два полициски и 1 армиски хеликоптер, за првпат 1 пинсгавер на ДЗС и еден хермелин со поголема цистерна на ДЗС. Поголем број пожарникари се на терен. Пожарот е ставен под делумна контрола. За жал, имаме уште два активни краци. Едниот предмалку успеавме да го ставиме под контрола благодарение на полицискиот хеликоптер, изјави Ангелов.
Од 5 часот утрово два полициски хеликоптера го гасат пожарот во реонот на Блаце. До овој момент, како што информира МВР, исфрлени се повеќе од 30 тони вода, а хеликоптерите се уште интервенираат на локацијата.
-Од 5 часот денеска полициски службеници од Хеликоптерската единица за полициски намени при МВР, со два хеликоптера на единицата за полициски намени, бел 412 и агуста бел 212, се активни во гасењето на пожарот во реонот на Блаце. До овој момент исфрлени се повеќе од 30 тони вода и се уште активно оперираат, соопшти Министерството за внатрешни работи.
Од Центарот за управување со кризи(ЦУК) информираат дека утрово се активни 4 пожари. Покрај овој во Општина Чучер Сандево активни пожари има и кај прилепското село Бешиште , потоа во општина Македонски Брод: кај селото Црешнево и под Солунска глава во општина Чашка.
Извор/фото МИА