Вести
Постигнат „кревок договор“ меѓу Трамп и Маск, по насилните протести во градот припадници на гардата пристигнуваат во Лос Анџелес
08.06.2025
Лос Анџелес е место на силни протести против политиката на депортација што ја спроведува американската служба за Имиграција и царинска контрола (ICE).
Две ноќи по ред, граѓаните излегоа на улиците за да го изразат своето незадоволство од сè поагресивните мерки за присилно отстранување на лица без регулиран статус на престој, што дополнително ги разгоре тензиите за ова веќе чувствително социо-политичко прашање.
Властите одлучија да ангажираат членови на Националната гарда. Според информациите потврдени за CNN од Изи Гардон, директорка за комуникации во канцеларијата на гувернерот на Калифорнија, Гавин Њусом, во моментов на терен има околу 300 членови на Националната гарда на Калифорнија. Гардон рече дека тие биле распоредени наутро во недела, на три локации низ Лос Анџелес.
Протестите избувнаа како одговор на најновите депортации и зголемениот број рации од страна на ICE. Многу демонстранти истакнуваат дека овие дејствија се нехумани и ги загрозуваат темелите на американското општество изградено врз идејата за имиграција.
Администрацијата на американскиот претседател Доналд Трамп претходно објави дека ќе испрати 2.000 војници на Националната гарда во Лос Анџелес по вториот ден судири меѓу демонстрантите и имиграциските агенти за време на рациите врз локални бизниси за кои се сомнева дека вработуваат нелегални имигранти, пренесува МИА.
Во исто време во петокот претставници на американскиот претседател Доналд Трамп и Илон Маск оствариле телефонски разговор по што беше прекината размената на остри изјави од двете страни на социјалните мрежи, објави Политико.
Но извори од двете страни нагласуваат дека „ни Трамп, ни Маск не сакаат да го прекинат јавниот спор“.