Бизнис
ГС1 СТАНДАРДИТЕ – ДВИГАТЕЛ НА МОДЕРНИТЕ БИЗНИС-ПРОЦЕСИ
Економија и бизнис | печатено издание | 01 мај 2025г.
Повеќе од 50 години, во глобални рамки ГС1 е посветен на дизајнирање и на имплементација на глобални стандарди за користење во синџирот на снабдување.
ГС1-стандардите претставуваат рамка која овозможува производите, услугите и информациите за нив ефикасно и безбедно да се движат во корист на бизнисите и за подобрување на животoт на луѓето секојдневно и насекаде.
Тие ги зближуваат компаниите кои ги претставуваат сите делови на синџирот на снабдување – производителите, дистрибутерите, продавачите на големо, болниците, превозниците, царинската управа, софтверските куќи, националните и меѓународните законодавни тела итн.
Ги користат и големите мултинационални синџири и малите маалски продавници, светски познатите брендови, но и индивидуалните занаетчии. Овие компании, чии интереси, всушност, се вкрстуваат, под наше лидерство соработуваат на изготвувањето на стандардите кои го прават синџирот на снабдување побрз, поефикасен, помалку комплексен и поевтин.
Добро дизајнираните стандарди за синџирот на снабдување играат многу важна улога во деловните операции кои се одвиваат секојдневно. Тие придонесуваат да се намали комплексноста меѓу организациите и во рамките на организациите, го олеснуваат донесувањето правилни одлуки за купување хардвер, софтвер и опрема, а со тоа потоа се намалуваат трошоците за имплементација, за интеграција и за одржување, ја олеснуваат соработката меѓу трговските партнери во синџирот на снабдување, што ја прави побрза и полесна идентификацијата на производите и го олеснува споделување на информациите (нарачани количества, достапноста или специфични карактеристики), нарачани и примени делови или состојки од доставувачите или испратена стока на клиентите.
Во светот полн со податоци, ГС1-стандардите помагаат да се пронајдат оние кои се важни за компаниите и овозможуваат заеднички јазик за идентификација, за зачувување и за споделување на податоците низ синџирот на снабдување, а притоа обезбедуваат важните информации секогаш да бидат достапни, точни и лесно разбирливи.
Во рамките на ГС1-стандардите постојат три главни области во чии рамки ГС1-организацијата развила и континуирано работи на одржување и на надополнување на стандардите:
- идентификација
- чување и прибирање
- размена.
Во секоја од трите области, во соработка со компаниите од целиот свет, се изработени стандарди и алатки кои се слободно достапни и отворени за сите компании бидејќи крајната цел на нашето работење е да се овозможи непречена комуникација и соработка меѓу компаниите без постоење на национални и на јазични бариери.
