Вести
Калас: Се надеваме и работиме на тоа планот „А“ за ЕУ интеграција да успее, ако тоа не се случи ќе поминеме кон следната фаза
23.05.2025
Високата претставничка на Европската Унија за надворешни работи и безбедност, Каја Калас, испрати порака дека европската интеграција на земјава останува приоритет, но и дека постои подготвеност за нови пристапи доколку актуелниот процес остане во ќорсокак.
На заедничката прес-конференција со премиерот Христијан Мицкоски во Скопје, одговарајќи на прашањето дали ЕУ има „план Б“ за Северна Македонија, слично како за Украина, Калас истакна дека фокусот останува на основниот пат.
- Како што и за другите случаи коишто ги споменавте. Ние се фокусираме на „план А“ и се обидуваме планот „А“ да профункционира. Затоа што кога се префрлате кон „план Б“, тогаш „план А“ излегува од игра. Можеби ви звучам како да зборувам шифрирано, но сакам да ви кажам дека сѐ уште се надеваме дека планот А ќе профункционира и ќе биде успешен. Работиме кон тоа, доколку не, тогаш ќе поминеме кон следната фаза, рече таа.
Во однос на можните механизми за деблокада на евроинтегративниот процес, Калас потврди дека Брисел е свесен за пречките и работи на нивно надминување.
- Прво, јасно е дека сакаме Северна Македонија навистина да се придвижи по овој пат и знаеме дека има пречки на него, и тоа го дискутиравме денеска за да можеме да изнајдеме механизми за да се надминат тие пречки, рече таа.
Додека, за прашањето за неинтеграцијата на Западен Балкан, и колку е тоа голема закана, одговори дека е важно сите да се целосно интегрирани.
- Ако ја погледнеме поголемата светска слика, секако јасно гледаме дека има разлика во големите сили, има тектонски промени. Западен Балкан секако е дел од Европа, и важно е за нас да бидеме сите целосна интегрирани. ЕУ е мировен проект, и тоа овозможува да се намалат тензиите во регионот на Западен Балкан. Затоа сметам дека тоа е и безбедносно прашање, посочи таа.
Премиерот Христијан Мицкоски денеска на заедничката прес-конференција со високата претставничка на Европската Унија за надворешни работи и безбедносна политика, Каја Калас, потенцира дека нашата определба е јасна, земјата припаѓа на ЕУ, за што досега вложила голем труд и направила многу жртви, но напомена дека таа определба треба да биде возвратена.
- Разговаравме за патот кон Европската Унија – пат кој не беше ни лесен, ни краток, ниту секогаш праведен. Пат со многу предизвици, компромиси и, за жал, предолго чекање. Нашата определба останува јасна – ние припаѓаме во Европската Унија. Не затоа што некој ни го должи тоа, туку затоа што со децении градиме општество на демократски вредности, владеење на правото, човекови права и добрососедство. Затоа што ние вложуваме, се жртвуваме и се менуваме, со надеж дека трудот ќе биде препознаен. Меѓутоа, таа определба мора да биде возвратена. Оваа држава има право да очекува многу појасна, поотворена и почесна потврда од самата Унија. Затоа што, ќе се согласиме, не сите земји членки и не секогаш, се однесуваа во европскиот дух кон Македонија. Имаше периоди на блокади, имаше непринципиелни барања, а имаше и тишина од Брисел, тогаш кога најмногу ни беше потребен било каков глас на поддршка, истакна Мицкоски на заедничката прес-конференција.
Нагласувајќи дека присуството на Калас денеска во Скопје е значајна порака дека ЕУ не го заборава овој регион и дека постои легитимен интерес за нашите состојби и нашите заложби, Мицкоски истакна дека разговарале отворено, како што им доликува на партнери кои се стремат кон заедничка иднина и оти од високата претставничка на ЕУ побарал фер третман и доследност во процесот.
-Денеска побарав фер третман. Побарав доследност. Побарав Европа да покаже лидерство, не само на хартија, туку и во реалноста. Да се врати довербата во европската идеја, особено кај младите. Да покажеме дека Европската Унија не е затворен клуб, туку жива визија, заедница на вредности, отворена за оние што ги живеат тие вредности. Денес не само што зборуваме за реформи, ние ги живееме нив. И тоа не го правиме за да добиеме аплауз, туку затоа што веруваме дека тоа е вистинскиот пат. Веруваме во европскиот сон, но и бараме да биде сон достапен за сите, не само за избраните. Затоа ја поздравувам денешната инаугурација на Првиот дијалог за безбедност и одбрана со Унијата. Тоа не е само вообичаена симболика. Тоа е сигнал дека се движиме во иста насока, нагласи премиерот.
Тој нагласи дека соработката со Балканската медицинска работна група и поддршката што ја добиваме во областа на одбраната, здравството и младинските политики се исто така чекори што значат многу за нас.
-И покрај сите предизвици, верувам дека иднината е на наша страна. Верувам во нашите граѓани, во нивната решителност, трпение и зрелост. Верувам и во визијата на Европската Унија, како заедница која ги вреднува принципите, не го заборава придонесот и знае кога е време да го направи вистинскиот чекор. Нашата рака останува подадена. Отворени сме за пријателство, за дијалог и соработка. Но, стоиме цврсто, исправени и достоинствени, со јасна порака: Ние сме подготвени. Европа може да смета на нас, а сега е време и ние да почнеме да сметаме на Европа. Нека оваа средба биде уште еден мост, мост на доверба, разбирање и заедничка иднина, истакна Мицкоски.
Извор/фото МИА