Вести
До средината на мај сите училишта во Кисела Вода ќе имаат фотоволтаици
08.04.2025
Во Општина Кисела Вода во рамки на проектот за поставување на фотоволтаични системи во сите основни училишта, веќе се инсталирани он-грид панели со капацитет до 20 киловати во четири училишта: ООУ „Кирил Пејчиновиќ“, ООУ “Партенија Зографски”, ООУ„Кузман Јосифовски-Питу“ и ООУ„Круме Кепески“.
Како што информира градоначалникот Орце Ѓорѓиевски, активностите продолжуваат со засилено темпо, со цел до средината на месец мај сите основни училишта во општината да бидат целосно опремени со сопствени фотоволтаици, што ќе ги направи енергетски ефикасни и финансиски одржливи институции.
Со поставувањето на овие фотоволтаици, училиштата ќе генерираат сопствена електрична енергија, што ќе значи значителна заштеда на финансиски средства, кои досега се трошеа за сметки за струја. Овие средства, отсега ќе се користат за подобрување на условите за настава и подобрување на целокупниот воспитно-образовен процес. Покрај тоа што директно се намалуваат трошоците, овој проект има и еколошка димензија, бидејќи се намалува зависноста од фосилни горива и се придонесува за чиста и здрава животна средина.
Проектот е реализиран со поддршка од повеќе институции, вклучувајќи ја Владата на Република Македонија, Министерството за образование, како и Бирото за регионален развој и Скопскиот плански регион.
Фото: Општина Кисела Вода