Вести
Општина Тетово повикува на јавна дебата за именување улици
02.04.2025
Општина Тетово во петок ќе организира јавна дебата за граѓаните да дадат предлози за имиња на улиците. Оттаму ги повикаа да учествуваат сите граѓани, здруженија и невладини организации.
Дебатата следи откако на 10 февруари беше објавен повик, граѓаните по електронски пат да достават предлози за преименување на улици во општина Тетово и именување нови улици.
- Секој предлог од граѓаните е важен и помага овој процес да биде инклузивен и успешен за граѓаните и градот Тетово. Заедно, отворено, транспарентно разговараме и даваме предлози, се вели во повикот на Општина Тетово.
Во август 2024 година, Советот на Тетово формираше работна група за преименување улици и именување улици чие име е определено со бројка. За оваа одлука гласаа 28 советници од 31 член.
По оваа одлука, подолг период, Сојузот на борци од Тетово бара да нема промена на имињата на улиците во ова подрачје од антифашистичкото минато на градот.
Сојузот на борците од НОБ и граѓаните продолжувачи од Тетово преку соопштение реагира на повикот на Општина Тетово за давање предлози за именување на улици. Општина Тетово објави повик за прибирање предлози за преименување на улици кои веќе имаат определено име и именување на новите улици во периодот од 10 февруари до 10 март.
- Општина Тетово продолжува да го води процесот за преименување на улици во градот и именување на нови улици и во таа насока објави 30 дневен јавен повик за доставување на предлози. Општина Тетово ги игнорира јавните апели на Сојузот на борци, политичките партии и граѓаните, како и ставот на Владата дека е неприфатливо преименување на постоечки имиња на улици во градот Тетово и упорно води постапка и за преименување на улици, се вели во соопштението на Сојузот на борци и граѓаните продолжувачи.
Тие сметаат дека повикот е само обид на Касами за да покаже демократија.
- Будно го следиме процесот и примаме почетни загрижувачки информации кои говорат дека Општина Тетово само се обидува да глуми демократија и вклученост на граѓаните, а дека во суштина предлогот веќе е на бирото на градоначалникот. Законот забранува водење на постапка за определување на имиња на улици најмалку 6 месеци пред одржување на локални избори, па ваквото брзање, глумење демократија, игнорирање на апели и поминување на претходно зацртани предлози е само во служба на предизборието и креирањето на меѓунационална криза и треба веднаш да престане, велат од Сојузот.
На 11 февруари Сојузот на борците од НОБ и граѓаните продолжувачи Тетово поднесе иницијатива за оценување на уставност и законитост на Одлуката на Советот на Општина Тетово од 2007 година која се однесува на промена на имиња на улици, а што не беше прифатена од Владата.
Извор/фото МИА