Вести
ПЕКОЛОТ ОД +40 СТЕПЕНИ ПРОДОЛЖУВА ВО ЧЕТВРТОК, Владата ги продолжи препораките за заштита од високите температури
14.08.2024
Владата денеска ја разгледа и усвои Информацијата за продолжување на дополнителните мерки за превенција поради топлотниот бран и за четврток, информира владината прес-служба. Владата соопшти дека мерките и препораките ќе важат и утре.
И утре ќе се задржи многу топло време со максимална температура наместа над 40 степени и ќе биде активно портокаловото ниво за опасност од високи температури, информира УХМР.
Од утре и во следните денови во попладневните и вечерните часови ќе има локална појава на нестабилност со пороен дожд, грмежи и услови за краткотрајно невреме.Според УХМР, за време на викендот и во почетокот на идната недела ќе биде нестабилно на повеќе места, локално во форма на невреме со интензивен пороен дожд, грмежи, силен ветер и град.
- Ослободување од работни обврски за најранливите групи на населението: бремените жени и лица на возраст над 60 години за ден 15 август (четврток). Во истиот период, работодавците да ги реорганизираат работните активности на градежните работници и на работниците кои работат на отворено, со тоа што ќе се избегне вршење градежни и други работни активности на отворено во периодот од 11 до 17 часот, соопштуваат од Владата.
Со оглед на фактот дека одредени ризични производни и технолошки процеси може да претставуваат дополнителен ризик по здравјето на изложените работници, од Владата ги потсетуваат работодавците на обврската за почитување на законските прописи од оваа област.
- Во установите за згрижување на децата (градинки) да не се практикува физичка активност и да не ги изнесуваат децата на отворено во периодот од 11 до 17 часот. Единиците на локалната самоуправа, Црвениот крст и Центрите за социјални работи во регионите зафатени со топлотниот бран да пружаат помош на осамени, стари, изнемоштени лица и бездомници, препорачуваат од Владата.
Поради високите температури над 40 степени, кои ја зафатија државата од почетокот на неделава, од Владата излегоа со препораки за заштита на населението од „портокаловата фаза“ од 12 до 14 август.
Извор МИА
фото freepic