Вести
Министерот за економија и труд најави социјален дијалог за минималната плата и цените на храната
04.07.2024
Со новата реорганизација на Министерството за економија и труд главниот фокус ќе биде засилена поддршка на индустријата, креирање мерки за микро, малите и средните компании, зголемување на конкурентноста на бизнисот, внатрешниот пазар, трговијата, како и поддршка на работодавачите, креирање на мерки и политики за вработување, подобрување на пазарот на труд и заштита на работничките права. Барањата на синдикатите за зголемување на минималната плата и изнаоѓањето решение со коморите, трговците, увозниците и производителите на храна за стабилизирање на цените ќе бидат приоритетите на новиот министер за економија и труд Бесар Дурмиши.
- Ќе се залагаме за отворен дијалог во рамки на Економско-социјалниот совет (ЕСС) и уште на првиот состанок на ЕСС под негово претседавање ќе се разгледа барањето на синдикатите за зголемување на минималната плата на 450 евра уште во првите 100 дена од формирањето на новата влада, изјави Дурмиши на денешната прес-конференција.
Министерството за економија заедно со коморите и стопанствениците ќе ја разгледаат листата од 1.600 производи за Законот за нефер трговски практики која е веќе објавена во Службен весник, а се очекува законот од септември да профункционира и да доведе до намалување на цените на прехранбените производи.
- Ќе се сретнам со коморите и произведувачите на храна за на некој начин да успееме да ја намалиме цената на храната во интерес на граѓаните. Со нив ќе разговарам за да ги видиме сите можности што ни се на располагање за евентуални промени во листата на производи, посочи Дурмиши.
Новиот министер за економија најави дека во наредниот период ќе поднесе барање до Државниот завод за ревизија за целосна ревизија на работењето на Министерството за економија почнувајќи од 2015 година.
Фото МИА