Вести
Бугарите најмногу купуваат недвижности на Халкидики
16.03.2024г.
Бугарите се први на листата на купувачи на недвижност на Халкидики, а по нив следат Србите, Романците и Израелците. Германските пензионери се повеќе заинтересирани за купување на помали и нискобуџетни селски куќи, пишува порталот „Нафтемпорики“.
Јоргос Цигарас, сосопственик на порталот за недвижнини, за грчките медиуми изјави дека повеќе од 50 отсто од недвижностите на Халкидики се во сопственост на странските државјани, пренесува „Еуроњуз.рс“. Според Цигарас Бугарите најмногу трошат при купувањето на недвижност, додека Израелците инвестираат во поевтини објекти со цел да ги доградат, реновираат и да ги продадат по повисока цена.
Купувачите од Србија, според изјавата на Цигарас, се заинтересирани за помали апартмани и се подготвени да платат од 60 до 70 илјади евра. Во овие рамки се движат и купувачите од Македонија. Над 70 отсто од купувачите од Романија и Бугарија се подготвени да платат до 150 илјади евра, а десет отсто бараат и куќи во вредност над милион евра.
Според податоците на порталот „Спитогатос“ во последниот квартал во 2023 година просечната цена на квадрат на Халкидики изнесува 2.193 евра, што е за 12,1 отсто повисока во истиот период лани. Во зависност од местото цената на еден квадрат во стара градба се движи од 1.800 до 1.900 евра. За новоизградени недвижности цените се 2.300 до 2.400 евра за квадратен метар во популарните одморалишта, пишува „Еуроњуз.рс“.
фото freepic