Вести
Швајцарците на референдум ќе гласаат за зголемување на пензиите
28.02.2024г.
Во Швајцарија во недела ќе се одржи референдум за зголемување на пензиите, а резултатите од изјаснувањето на граѓаните е неизвесно, поради загриженоста за финансирање на планот за подобрување на стандардот на пензионерите, пренесува „Ројтерс“.
Претходно Швајцарската федерација на синдикати предложи на постарите граѓани да им се исплати 13 пензија и на овој начин да им се намалат трошоците за живот, а највисока ставка се високите станарини. Оваа идеја е поддржана од партиите од левиот центар, но Владата на Швајцарија и парламентот на оваа земја, која е составена од десниот блок на партии, се противат на зголемувањето на пензиите и сметаат дека тоа е финансиски неодржливо.
Граѓаните на Швајцарија се поделени околу ова референдумско прашање, а поддршката за овој план постојано опаѓа. Две третини од граѓаните, во анкетата спроведена кон крајот на минатата година, се изјасниле позитивно за зголемување на пензиите. Истражувањата од минатата недела покажува дека поддршката е намалена на 53 отсто.
Минималната старосна и семејна пензија во Швајцарија изнесува 1.225 швајцарски франци, околу 1.288 евра, а максималната пензија изнесува 2.450 франци.
Гласачите во Швајцарија ќе се изјаснат на референдумот и за подигнување на старосната граница за одење во пензија на 66 години до 2033 година. Анкетите покажуваат дека овој предлог нема да биде изгласан од граѓаните.
фото freepic