Вести
Во Србија бројот на свињи е намален за над еден милион грла
21.02.2024г.
Во Србија продолжува негативниот тренд во сточарството, а тоа се одрази и на намалување на домашната потрошувачка на сите видови на месо. Во 1990 година просечната потрошувачка по глава на жител била 65 килограми, а сега е намалена на околу 42 килограми. Иако, свинското месо е доминантно на домашната трпеза, во Србија има се помалку грла на свињи. Конкретно, бројот на свињите е намален за над еден милион грла во последните 11 години, пренесе Еуроњуз.рс
Според првите резултати на пописот за земјоделство во 2023 година бројот на свињите во Србија е 2.263.705, што е за 30,7 отсто помалку во однос на анкетата за структурата на земјоделските стопанства од 2018 година. На пописот во 2012 година биле регистрирани 3.403.288 свињи. На секои десет домаќинства во Србија, шест се занимаваат со сточарство и нивниот број изнесува 313.495. Од нив 57.259 одгледуваат свињи.
Падот на српското сточарство во Србија почна од 1990 година, а има повеќе причини: забраната за извоз на свинско месо, која траеше десет години, но и поради санкциите и високата инфлација во земјата. Дополнителен удар на домашното производство на месо беше и големиот увоз на свинско месо и прасиња за тов.
Заради сузбивање на епидемијата на афричката чума на домашната свињи, во Србија е извршена еутаназија на околу два отсто од целокупниот сточен фонд. Тоа ќе се одрази и на понудата на свинското месо во наредниот период, предупредуваат од Министерството за земјоделство.
Во периодот од 2023 година до 1 февруари годинава во Србија биле уништени околу 79 илјади свињи.
фото: freepic