Вести
Милковски: Градевме на пет континенти, а денеска не можеме дома!
19.02.2024г.
- Градежништвото беше ударна сила на македонскиот развој. Градевме на четири-пет континенти, а сега не можема да градиме дома. Хрватските студенти учеа од нас за примената на новите техники. Зошто се елиминираат домашните компании, кога странските фирми не се подобри по квалитет од нашите градежни фирми. Тие ги користат нашите работници, ниедна странска фирма не донела нивни работници. Што е тоа што ни недостасува? Дали е знаење, дали е патриотизам! Ако недостасуваат мерки, тоа е поради немање слух на секоја од досегашните влади за предлозите кои доаѓаат од домашните стопанственици, изјави Страшо Милковски, претседателот на Управниот одбор на „Гранит“, по повод промовирањето на стратешките документи за забрзан економски развој, предложени од Стопанска комора на Македонија.
Тој ги негираше изнесените ставови на поединци дека домашните компании не се „подготвени за големи градежни проекти“, а како аргументи го наведе големото портфолио на проекти во другите земји, во чија реализација успешно учествуваше „Гранит“.
- Оваа држава може да ја градиме самите. Се што е направено во Македонија е од наши градежни компании. Странците нема да ни ја изградат државата. Досега никој од власта не ги прочитал документите што ги предлага Комората. Ако некој ги прочита, треба добро да се замисли. Досега не се случило тоа, изјави Милковски.