Вести
Бишев: Немаме доволно поддржувачи за реформите
19.02.2024г
- Дали не сме пристрасни, кога некогаш тмурно гледаме на работите кои ни се случуваат во македонската економија. Од една страна правиме стратегии за развој, но кога ќе треба да ги имплементираме сфаќаме дека немаме доволно поддржувачи за реформите. Не успеаваме да изградиме амбиент за да дојдат до израз позитивните примери, а нив ги има многу. Драго ми беше кога пред многу години кога ги прифативме промените и кога македонски фирми ги градеа патиштата во Хрватска. Зошто не можеме да се организираме и да собереме доволен број на подржувачи за поттикнување на економскиот раст и да создадеме перспективи за младата генерација, кои ќе продолжат да ја развиваат македонската економија, изјави Глигор Бишев, банкарски и финансиски експерт, во дебатата по повод презентацијата на книгата „Стратешки документи на Комората“, која беше организирана минатата недела од Стопанската комора на С. Македонија“.
Реформите се тешки и одредени економски субјекти кои имале бенефити ќе мораат да се прилагодат на новите мерки на економските политики, со кој ќе се смени амбиентот на стопанисување, додаде тој.
- Тие што користеле јаглен за производство на струја или мазут и нафта во производните процеси, ќе мора брзо да се преструктурираат и ќе бидат губитници. Добитници ќе бидат тие што ќе се прилагодат на зелената енергија. Тука е улогата на Стопанската комора во градењето на општествен консензус. Мора да создаваме наши традиции и наши лидери во економијата. Сакам да кажам дека Комората е во вистинска насока и веруваме истрајноста на крајот ќе се исплати, рече Глигор Бишев.