Вести
Германската влада ќе ја намали прогнозата за економскиот раст
16.02.2024г
Германската влада ќе ја намали прогнозата за економскиот раст на земјата во 2024 година на само 0,2 отсто. Во извештајот кој ќе биде објавен следната недела се предвидува понизок раст, во споредба со октомвриските прогнози за економскиот раст на Германија за 1,3 отсто во 2024 година, соопшти анонимен извор за агенцијата „Ројтерс“.
Намалувањето на прогнозата за раст на германската економија е поради слабиот раст на глобалната економија и поради пресудата на Сојузниот уставен суд која предизвика финансиска празнина во државниот буџет на земјата.
Претходно, Институтот за економски истражувања ИФО искажа поголем оптимизам за очекуваниот економски раст на Германија од 0,7 отсто во 2024 година. Германската економија во 2023 година падна за 0,3 отсто поради високата инфлација, растот на каматните стапки и забавениот раст на светската економија.
Оваа недела Европската комисија ја намали прогнозата за раст на 0,9 за ЕУ и 0,8 отсто за еврозоната. По тесното бегство од рецесијата кон крајот на 2023 година, економијата на Европската Унија влезе во 2024 година со помала енергичност од очекуваното, како што беше потврдено од Европската комисија во најновата зимска економска прогноза, објави „Еуроњус“.
Новите проекции ја истакнуваат намалената перспектива за раст за годината, која сега се очекува на скромни 0,9 отсто во ЕУ, што е намалување од претходно очекуваните 1,3 отсто, при што прогнозата на еврозоната е слично прилагодена на 0,8 отсто од претходните 1,2 отсто.
Во 2024 година, се очекува раст на сите економии на ЕУ, иако разликите се забележителни. Се очекува голем број помали економии да забележат зголемување на нивниот БДП во опсег од 2-3 отсто во 2024 година, за разлика од поголемите економии, кои веројатно ќе се соочат со повеќе предизвици.
Изгледите за раст за Франција се ревидирани надолу од првичното предвидување од 1,2 за 2024 година на 0,9 отсто, при што прогнозата за 2025 година, исто така, е малку намалена на 1,3 отсто. Прогнозата за Италија во 2024 година е намалена на 0,7 отсто, додека проекцијата за 2025 година останува непроменета. Економските проекции за Шпанија и за 2024 и за 2025 година останаа исти.
фото: freepic