Вести
Ангеловска-Бежоска: Инфлацијата во Македонија ја сведовме на европско ниво
15.02.2024г.
Ако се споредуваме колкави се каматните стапки кај нас во однос на Европската Унија, сега, тие се изедначија. Кај нас стартната основа на каматите беше повисока, но покачувањето беше пониско. Во ЕУ имаа пониска основа но затоа пак, покачувањата беа на повисоко ниво. Сега, каматната стапка на кредитирање кај нас е во просек 5,5 проценти што е слично со ЕУ околу 5,5 проценти. Кај домаќинставата задолжувањето е по пониска каматна стапка во однос на просекот од Европската Унија. Овде зборуваме за просек, секако дека во некои земји од ЕУ има повисоки камати. Ова сумарно покажува дека успеавме да ја стабилизираме инфлацијата и да ја сведеме на европско ниво. Кај нас инфлацијата е 3,6, а во ЕУ 3,4 изјави гувернерката на Народната банка, Анита Ангеловска-Бежоска, во разговор за порталот Пари.мк.
На почетокот на годинава инфлациските трендови се попозитивни од минатата година. Во Македонија инфлацијата е сведена на едноцифрено ниво, а во декември се сведе на 3,6 проценти. Ова стабилизирање на инфлацијата, како што објаснува гувернерката е поради два клучни фактора: стабилизирање на цената на енергијата и на храната. Во однос на минатата година, цената на нафтата бележи значителен пад, а слични трендови има и кај храната. За разлика 2021 и 2022 цената на храната растела во просек од 30 до 40 проценти. Лани, има пад на индексот на раст на ценита на храната од 13 проценти. Ова влијае и на инфлациските движења. Вториот клучен фактор за стабилизирање на инфлацијата во Македонија е прудентната политика на централната банка на Македнија.
- Мерките и политиките на Народната банка придонесуваат за зачувување на финансиската стабилност, којашто е предуслов за здрава економија, економски раст и развој. Адекватноста на капиталот на банките е на највисокo ниво во изминатите 17 години, што е суштински за задржувањето на стабилноста при соочување со евентуални ризици, но исто така и од аспект на кредитирањето и поддршката на граѓаните и фирмите, посочи гувернерката на Народната банка, Анита Ангеловска-Бежоска, во разговорот за порталот Пари.мк.
Покрај мерките за одржување на финансиската стабилност, централната банка презема мерки и за заштита на потрошувачите, вклучително и за поголема транспарентност на цените на одделни основни банкарски производи, либерализацијата на пазарот на платежни услуги, како и формирањето на новата Дирекција за заштита на потрошувачите и финансиска едукација.
Поставеноста на монетарната политика ќе зависи од макроекономските податоци, односно од инфлацијата и состојбите на девизниот пазар, но и од поставеноста на монетарната политика на Европската централна банка (ЕЦБ), поради фиксниот курс на денарот во однос на еврото. Таа истакнува дека е најважно да се стабилизираат инфлацијата и инфлациските очекувања.
- Доколку се задржат тековните поволни трендови кај инфлацијата и кај девизниот пазар, а изостанат ризиците, тоа секако ќе остави простор за водење пофлексибилна монетарна политика, посочува Ангеловска-Бежоска.