Вести
3G технологијата заминува во историјата
Што значи тоа за корисниците?
01.02.2024г
Досега честопати се зборуваше за тоа, но сега конечно дојде моментот да кажеме: 3G технологијата заминува во историјата. Промените во телекомуникациската индустрија се случуваат вртоглаво брзо и практично секоја година добиваме подобра и поквалитетна услуга, додека старите технологии и стандарди се заменуваат со понови и поефикасни решенија.
Телекомуникациските компании полека ги исфрлаат од употреба застарените 3G мрежи, во процес којшто популарно почна да се нарекува „3G retirement“. Но, нема потреба од загриженост бидејќи ова не значи дека мобилната мрежа ќе престане да работи, туку напротив, таа ќе биде заменета со понов, современ мрежен стандард.
Со современите мрежни технологии како 4G и 5G веќе чувствуваме промена во начинот на кој ја консумираме и користиме технологијата. Овие нови технологии овозможуваат молскавични интернет брзини, значително помала латенција и генерално подобро корисничко искуство за сите. Тие го отвораат патот кон цел еден свет на вмрежени технологии, како самоуправувачки автомобили или проширена реалност (AR), го подобруваат гејмерското доживување и овозможуваат висококвалитетен видео стриминг.
На глобално ниво, актуелно е „пензионирањето“ на 3G мрежата, а кај нас Македонски Телеком е првиот оператор којшто ќе го направи овој чекор и, до крајот на март годинава, целосно ќе ја деактивира 3G технологијата.
Телеком ги започна подготовките за гаснење на 3G мрежата неколку години претходно, со вградување нова и надградена опрема, адаптирана на новите 4G и 5G стандарди коишто ќе ја одбележат следната фаза во технолошката еволуција. Денес, корисниците на Телеком имаат пристап до гигабтини брзини со 5G мрежата којашто ќе продолжи да се шири и надградува.
Што ќе се случи со вашиот уред по гаснењето на 3G мрежата?
Кога вашиот оператор ќе ја изгаси 3G мрежата, за да користите интернет ќе ви треба смартфон што поддржува понови технологии, иако и постарите уреди ќе бидат достапни за гласовни повици и СМС преку 2G мрежата. Услугата 4G е достапна бесплатно за сите корисници и таа се активира автоматски. Достапноста на услугата 5G зависи од тарифата што ја имате.
Како да знаете дали вашиот уред ќе работи по гаснењето на 3G мрежата?
Можете да проверите дали вашиот уред е компатибилен со новите мрежни стандарди едноставно преку проверка на неговите спецификации. Уредите со 4G и 5G стандард ќе продолжат да работат и по гаснењето на 3G мрежата.
Со исфрлањето од употреба на 3G стандардот, практично се прави замена кон подобра, побрза и поквалитетна мрежа којашто ќе обезбеди нови функционалности и можности за сите.