Вести
Маер: Ќе продолжиме со интензивни инвестиции во модернизација на електродистрибутивната мрежа во земјава
Што очекувате од 2024 година?
Волфанг Маер, претседател на Управниот одбор на ЕВН Македонија
„Енергетската криза предизвика големи промени на пазарите, а енергетските компании беа први на удар. Токму енергетската криза ни покажа дека турбуленциите на пазарот можат да ги поминат успешно само компаниите кои брзо ги антиципираат промените и се прилагодуваат. Успеавме да ги зајакнеме нашите критични процеси, а во промените особено ни помогна процесот на дигитализација и имплементација на иновациите. Со почеток на воените дејствија во појасот Газа, повторно цените на енергентите се зголемија откако неодамна се вратија, па очекувам ценовната нестабилност да продолжи и во текот на 2024 година. Ние не можеме да влијаеме, но можеме да се подготвиме и да ги намалиме ризиците. ЕВН Македонија има големо искуство од повеќе пазари и тоа е драгоцена експертиза во вакви времиња на брзи промени. Предизвици со кои се соочуваме во моментов, а секако и во следната година, се кражбите на електрична енергија во дистрибутивната мрежа, кои, за жал, се уште креираат големи финансиски загуби. Паралелно работиме да обезбедиме оптимални тарифи и модерни услуги за нашите клиенти. Друг клучен момент е енергетската транзиција и воведувањето на ЕСГ-стандардите, за заштита на животната средина и висока општествена одговорност. Во 2024 година ЕВН Македонија ќе продолжи со овие важни процеси, односно со вложување во зелената транзиција каде што имаме многу проекти. Во прилог на тоа би сакал да го истакнам проектот Електромобилност преку кој ЕВН Македонија даде и понатаму ќе дава огромен придонес во земјава. И, секако, ќе продолжиме со интензивни инвестиции во модернизација на електродистрибутивната мрежа во земјава како лојални партнери на нашите клиенти.“