Вести
Азески: ИНФРАСТРУКТУРА, ИЗВОЗ, ИНВЕСТИЦИИ
Што очекувате од 2024 година?
Бранко Азески, претседател на Стопанската комора на Северна Македонија
„Предизвици и нарушувања во нашата и секако генерално, во сите економии, од секаков аспект и кризи има и ќе има и во иднина, но економиите мора да се консолидираат и да го фатат чекорот кон новите трендови за постигнување повисоки стапки на економски раст. За развој на една економија на среден рок мора да се имаат клучните аспекти − подобрување на инфраструктурата, зголемување на извозот и на инвестициите.
Потребно е владеење на правото, предвидлива рамка за дејствување, задолжително консултирање на бизнис-заедницата за законските прописи кои го засегаат работењето на компаниите, промена на образовниот модел со цел продуцирање на кадри за бизнисот и повеќе „зелени“ и дигитализирани компании за поголема профитабилност и продуктивност.
Очекувам поголема соработка со науката и со образовните институции за подготовка на стручни економски анализи за потребите на бизнисот и вистинска соработка со владините институции. Ама вистинска, не декларативна.
Ние како најголема бизнис-асоцијација стоиме зад секој кажан збор и гарантираме дека имаме знаење и способност за да се вклучиме во сите процеси што значат напредок. Компаниите и покрај сите предизвици покажаа дека може подобро. Добро е да имаат „ветар во грб“ од државата и тоа во облик на обврска на државата да креира поволен амбиент за оние кои најмногу придонесуваат и го полнат Буџетот“.