Вести
Наумоски: Иако има стабилизирање на одредени пазари, како и нормализирање на протокот на стоките, остануваат уште неизвесности на пазарот
Што очекувате од 2024 година?
Сашо Наумоски, генерален директор на Витаминка
„Случувањата во тековнава година оставија малку простор за големи очекувања од 2024 година и повторно влегуваме со воздржан оптимизам за сето она што непредвидливо може да се случи. Иако има стабилизирање на одредени пазари, како и нормализирање на протокот на стоките, остануваат уште неизвесности на пазарот.
Пред сè снабденоста и цената на електричната енергија и воопшто енергентите, има секојдневни варијации на цената на суровата нафта, а нема индикации дека тоа ќе се промени. Голем дел од нашата работа е зависна од овие две варијабли.
Сепак, зборуваме за предвидување во услови на голема макроекономска нестабилност, проследено со инфлаторни движења, воени конфликти кои посредно може да се одразат и кај нас, поконкретно со можни мерки и условувања.
Во овој период извесно очекување ни се резултатите од инвестициите во сончева енергија преку инсталираните соларни колектори, што ги имавме во континуитет подолго време и што барем до одреден процент ни ја гарантира електричната енергија.“