Вести
Јосифовски: Сè на сè, очекувам 2024 година да биде тешка и неизвесна година за македонската економија и за граѓаните на Република Северна Македонија
Што очекувате од 2024 година?
Андреја Јосифовски, претседател на УО на Макпетрол АД
„2024 година е изборна година во Република Северна Македонија. Ќе се одржат претседателски и парламентарни избори во земјава. Политичките партии и од власта и од опозицијата максимално ќе бидат посветени на изборната трка и на изборните резултати.
Интересите на стопанството и на граѓаните ќе бидат во втор план. Стапката на инфлација и понатаму ќе биде висока (околу 5 до 6 %), а не очекувам растот на БДП да биде поголем од 2,5 % на годишно ниво.
Сивата економија, корупцијата и криминалот во Република Северна Македонија и во 2024 година ќе бидат на многу високо ниво поради што граѓаните во земјава не може да очекуваат борба против овие девијантни појави од страна на нивните креатори.
Сè на сè, очекувам 2024 година да биде тешка и неизвесна година за македонската економија и за граѓаните на Република Северна Македонија.
За МАКПЕТРОЛ АД очекувам 2024 година да биде уште една успешна година на деловен план. Очекувам раст на прометот и на профитот, нови инвестиции и нови вработувања. Компанијата ќе го продолжи својот развој во основната дејност – промет со нафта и нафтени деривати, и ќе ги зголеми вложувањата во транзицијата кон зелена енергија.
Грижата за вработените, заштитата на животната средина, задоволството на потрошувачите и на акционерите на МАКПЕТРОЛ АД остануваат наш приоритет и во 2024 година.
Во 2024 година на сите граѓани на Република Северна Македонија им посакувам мир, спокој, здравје, среќа и успех во животот.“