Вести
Мојсоска-Блажевски: Сè ќе зависи од спремноста на новата влада да се справи со најголемиот проблем на економски и општествен план, корупцијата
Што очекувате од 2024 година?
Никица Мојсоска-Блажевски, главен извршен директор на Македонија2025
„Очекувам година во која политиката ќе ја „надвладее“ економијата, пред сè поради претседателските и парламентарните избори во април, односно мај. Во периодот на функционирање на техничката влада не се носат значајни одлуки поврзани со економијата, не се имплементираат реформи, фокусот е на други области. Дотолку повеќе што често се предлагаат и се ветуваат економски нездрави и неодговорни политики во форма на предизборни ветувања кои потоа создаваат штети при евентуална имплементација. И, воопшто, јавниот дискурс и дебати се „заробени“ од политичките партии и кампањи и нè туркаат во дискусии кои не се важни или не се најважни за растот на економијата, за конкурентноста на бизнисите или за повисок животен стандард на граѓаните.
Макроекономските предизвици (инфлацијата) ќе стивнат, но ќе „стивнат“ и капиталните инвестиции за кои очекувам ниска реализација поради повеќе причини. Ќе биде интересно да се видат предизборните политички програми, можеби ќе има некои иновативни идеи и развојни решенија. Потоа сè ќе зависи од имплементацијата на програмите и од спремноста на новата влада да се справи со најголемиот проблем на економски и општествен план, корупцијата“.