Вести
Љушев: Наредната година е клучна за правилно да ги поставиме темелите на дигиталната етика
Што очекувате од 2024 година?
Никола Љушев, главен извршен директор на Македонски Телеком
„Еден од најголемите предизвици е балансирањето на технолошкиот напредок со етичките норми и јавниот интерес. Тоа значи дека употребата на новите технологии, а особено на вештачката интелигенција, ќе треба да се регулира соодветно, и тоа што поскоро.
Геополитичките конфликти ќе продолжат да ја продлабочуваат економската нестабилност и нееднаквост, што дополнително ќе влијае на зголемување на дигиталниот јаз. И тука многу е важно да се дејствува веднаш. Во дигиталното општество треба да бидат вклучени сите.
Брзиот раст на сајбер криминалот ќе оди само во нагорна линија и за да се пресретне ќе бидат потребни силни мерки за заштита на мрежите и на податоците.
Одржливите иновативни решенија како што се паметните градови ќе ни помагаат да се справиме со болестите на модерното време: недостатокот на вода, загадениот воздух, зголемувањето на штетните емисии на јаглерод, пренаселеноста и сл.
И она што е најважно, технологијата треба да ја ставиме во интерес на човекот, на пример телемедицината треба да биде широко достапна.
Нè очекува година со многу предизвици кои треба да ги надминеме за да создадеме хумано дигитално општество“.