Вести
Мукаетов: Нашите очекувања за 2024 година се да продолжиме по патеката на континуираниот раст
Што очекувате од 2024 година?
Живко Мукаетов, генерален директор на Алкалоид АД Скопје
„Трендот на работење во отежнати економски услови кои беа актуелни во изминативе неколку години сосема е извесно дека ќе продолжи и во 2024 година. Доминантни предизвици беа инфлацијата и порастот на каматните стапки кои, сепак, според сите очекувања, би требало да влезат во зоната на стагнација, а можеби и благо опаѓање. Секако, безбедносните глобални кризи го отежнуваат економскиот амбиент и предвидливоста што секогаш може да повлијае и на цените на енергентите, да создаде потешкотии кај синџирите на испораки, но и да повлијае на достапноста на одредени материјали. Во секој случај, нашите очекувања за 2024 година се да продолжиме по патеката на континуираниот раст што го базираме на можностите од нашите тековни инвестиции во новите производни капацитети и опреми и вложувањата во развојно-истражувачките проекти, на тој начин создавајќи конкурентно портфолио и можности за ширење на пазарите. За остварување на овие цели ќе продолжиме и со нови вработувања во земјава, но и на странските пазари, притоа континуирано вложувајќи во подигнување и усовршување на нивото на знаења и вештини на нашите вработени и градење на таленти“.