Вести
РУСКАТА ВЛАДА ЌЕ ИЗДАВА КРИПТОВАЛУТА
блиц свет
Рускиот претседател Владимир Путин даде одобрение за издавање криптовалута што ќе се вика крипторубља. Дигиталната валута ќе биде под контрола на Владата и нема да биде дозволено т.н. „рударење“. „Покренуваме криптовалута од едноставна причина што ако ние тоа не го направиме ќе го направат нашите соседи од Евроазиската економска заедница за два месеца“, изјави министерот за комуникации Николај Никифоров. Сите финансиски операции со таа валута ќе бидат оданочени. Данокот ќе се применува на која било добивка која ќе ја оствари сопственикот на криптовалутата преку разликата меѓу куповната и продажната цена. „Кога купувате или продавате крипторубља ќе ви биде наплатен данок од 13 отсто. Ако сопственикот, од некоја причина, не може да го објасни потеклото на криптовалутата, а сака да ја претвори во рубли, ќе му бидат одземени 13 отсто од вкупната сума“, изјави министерот. Националната дигитална валута ќе биде префрлена на меѓународниот пазар бидејќи, како што истакна рускиот министер, бесполезно е да циркулира само во земјата.