Соединетите Американски Држави купуваа јапонски јени за прв пат по повеќе од една деценија како „гест на пријателство“, изјави претседателот Доналд Трамп во неделата. Оваа ретка заедничка интервенција на САД и Јапонија на девизниот пазар имаше за цел зајакнување на јенот, кој падна на 40-годишно најниско ниво во однос на американскиот долар.
„Нивниот јен е слаб и им требаше малку помош. Ние секогаш сме тука за Јапонија“, им рече Трамп на новинарите.
Соединетите Американски Држави имаат интерес да ја поддржат јапонската валута бидејќи посилниот долар го прави американскиот извоз поскап и помалку конкурентен на странските пазари. Од друга страна, слабиот јен им користи на јапонските извозници и странските туристи што ја посетуваат Јапонија, но во исто време го прави увозот на нафта и гас поскап, што ја поттикнува инфлацијата.
Јапонскиот министер за финансии Сацуки Катјама во понеделник објави дека заедничката интервенција „беше одговор на прекумерната волатилност и непредвидливите движења на јапонскиот јен во изминатите месеци“.
Фајненшл тајмс прв објави дека филијалата на Федералните резерви во Њујорк продавала евра и купувала јени во име на Министерството за финансии на САД, повикувајќи се на извори запознаени со трансакцијата.
Јапонија е една од најголемите економии во светот, но таа се бори со слаба национална валута со децении.
По рецесијата и продолжената дефлација од 1990-тите, централната банка на Јапонија ги одржуваше каматните стапки на нула или дури и под нулата за да го стимулира економскиот раст. Иако почна да ги зголемува каматните стапки во 2024 година, тие се уште се значително пониски отколку во повеќето развиени земји, додека западните централни банки агресивно ги зголемуваат каматните стапки за да ја ограничат инфлацијата.
Постојано ниските каматни стапки во Јапонија во однос на другите земји, особено САД, ги охрабрија меѓународните инвеститори да инвестираат пари во валути со повисок принос. Дополнителен притисок врз јенот претставуваат големите инвестиции на јапонските компании во странство, како и фактот дека значителен дел од нивната заработка остварена во други земји останува надвор од Јапонија.
Повеќето аналитичари веруваат дека дури и најновата заедничка интервенција на САД и Јапонија нема да го промени долгорочниот тренд на слабеење на јенот. Некои од експертите сметаат дека интервенциите на девизниот пазар најчесто можат „само да купат време“, пренесува Еуроњуз.
Фото Економија и бизнис
