Во сабота, 06 јуни 2026 година, ќе се одржи велосипедска тура околу Охридското Езеро за да се прослави Денот на Европа, а воедно ќе се промовира одржлива мобилност, еколошка свест, здрав начин на живот и граѓанско учество. Оваа прекугранична велосипедска тура е заедничка активност на делегациите на Европската Унија во Северна Македонија и во Албанија и се спроведува во партнерство со Јуроп Хаус во Струга и Јуроп Хаус во Тирана.

Велосипедската тура околу Охридското Езеро ќе започне од Паркот на поезијата во Струга, Северна Македонија и ќе продолжи до Поградец, Албанија, преку граничниот премин Ќафасан. Велосипедистите од двете земји потоа ќе поминат низ граничниот премин „Св. Наум” за да продолжат кон Охрид и да ја завршат својата рута во Струга.

Патеката околу Охридското Езеро ги поврзува заедниците преку границите околу една од најважните природни и културни знаменитости во регионот. Велосипедската тура ја истакнува важноста на регионалната соработка и врските меѓу луѓето во градењето позелена и пообединета иднина. Таа симболизира заедничко славење на европските вредности, соработка и одржливост.

Програмата за Денот на Европа во 2026 година, претставена под слоганот „Наша Европа. Посилни Заедно “, се организира од Делегацијата на Европската Унија, мрежата на Јуроп Хаус и амбасадите на земјите-членки на ЕУ.

Фото Економија и бизнис