Температура повисока од 50 степени би можела да се забележи на метеоролошка станица во јужна Европа ова лето, предупредува професор од Универзитетскиот колеџ во Лондон (UCL).

Во текот на следните неколку дена, се очекува температурите на медитеранските острови како Сардинија и Сицилија да надминат 40 степени. Ова лето, Барселона веќе го забележа најжешкиот ден во својата историја, кога температурата достигна 40,5 степени на 8 јули. Франција, исто така, го сруши рекордот на 24 јуни, со просечна дневна и ноќна температура од 29,8 степени.

„Температури над 50 степени се сосема можни подоцна ова лето“, вели професорот Бил Мекгваер, експерт за геофизички и климатски опасности на UCL.

„Сегашниот рекорд е 48,8 степени и е регистриран на Сицилија во 2021 година. Ако не се случи оваа година, 2027 година е многу веројатна, бидејќи влијанието на сè помоќниот супер Ел Нињо ќе биде уште поизразено“, предупредува климатологот.

Највисоката температура некогаш регистрирана во Европа е регистрирана на мерна станица во Сиракуза, Сицилија, за време на долготраен систем со висок воздушен притисок познат како антициклон, со прекар „Луцифер“.

„Летата сè повеќе ќе носат температури над 40 степени што ќе траат со недели. Ќе биде премногу жешко за речиси секоја активност, а особено опасно за постарите лица и малите деца. Дополнително, како што сега гледаме во Шпанија и на југот на Франција, шумските пожари ќе бидат сè поголем проблем низ медитеранскиот регион, загрозувајќи животи и имот.“

Ставрос Дафис, истражувачки соработник во Националната опсерваторија во Атина, се согласува со ова и верува дека границата од 50 степени се приближува.

Трендот напредува побрзо отколку што очекувавме. Не би ме изненадило ако во текот на следната деценија, со соодветни синоптички услови, првото автентично отчитување од 50 степени биде забележано во внатрешноста на јужна Шпанија, Сицилија или можеби Грција, пренесува Еуроњуз Србија.

Фото Економија и бизнис