По повод Светскиот ден на срцето, денеска во Europe House Скопје ќе се одржи едукативен панел под мотото „Не пропуштај ниту еден ритам“ (Don’t Miss a Beat).
Настанот го организира Здружението за кардиологија, во партнерство со Министерството за здравство и Канцеларијата на Светската здравствена организација (СЗО) во Скопје.
Целта на панел-дискусијата, како што велат од Здружението за кардиологија, е да се испрати силна јавна порака за сериозноста на кардиоваскуларните болести и потребата од нивна рана превенција, навремено препознавање на симптомите и подобра контрола на ризик-факторите.
На панелот ќе се обратат претставници на Здружението за кардиологија, Министерството за здравство и Светската здравствена организација, кои ќе зборуваат за значењето на превенцијата, раната дијагностика и институционалната и личната одговорност во заштитата на срцевото здравје.
Кардиоваскуларните заболувања и понатаму претставуваат еден од најголемите здравствени предизвици во земјата. Преку оваа иницијатива, организаторите ќе ја нагласат важноста на редовните превентивни прегледи, здравите животни навики и навремената медицинска грижа како клучни предуслови за спасување животи.
Извор МИА
Фото Економија и бизнис
