Светската економија се очекува да порасне за 2,9 проценти во 2026 година, а потоа да забрза на три проценти следната година, и покрај ефектите од конфликтот на Блискиот Исток, повисоките цени на енергијата и зголемената неизвесност во трговската политика, соопшти Организацијата за економска соработка и развој (ОЕЦД) во својот нов извештај.

Прогнозата за оваа година е малку зголемена во споредба со претходната јунска проекција, кога изнесуваше 2,8 проценти, додека прогнозата за 2027 година е ревидирана надолу од 3,1 процент.

Глобалниот раст забави во првата половина од 2026 година, но остана отпорен во многу земји, со големи залихи на нафта, дополнителна понуда од производители надвор од Персискиот Залив и владини мерки за поддршка кои го ублажија влијанието на конфликтот врз глобалната економија, соопшти ОЕЦД во извештај.

Активностите поврзани со вештачката интелигенција, исто така, продолжија да ги зголемуваат инвестициите, производството и трговијата.

Економијата на еврозоната треба да порасне за по еден процент во 2026 и 2027 година, а се очекува побарувачката да се зајакне по нормализацијата на цените на енергијата и забрзувањето на новите инвестиции во одбраната.

За Соединетите Американски Држави, се очекува БДП да порасне за 2,2 проценти оваа година и 2,1 процент во 2027 година.

Силните инвестиции поврзани со вештачката интелигенција треба делумно да го компензираат забавувањето на потрошувачката и растот на реалните приходи, забележува ОЕЦД.

Економскиот раст на Кина треба да се забави од 4,5 проценти во 2026 година на 4,2 проценти во 2027 година, се додава во извештајот.

Фото Економија и бизнис