Развиените економии, вклучувајќи ги САД и Велика Британија, треба да го намалат задолжувањето и нивото на јавен долг поради зголемените трошоци за сервисирање на долгот, предупреди директорката на Меѓународниот монетарен фонд, Кристалина Георгиева.
Во интервју за Би-Би-Си, на маргините на Генералното собрание на Обединетите нации во Њујорк, Георгиева изјави дека глобалните економски шокови го зголемиле нивото на долг, додека владите досега не презеле доволно мерки за да ги ограничат трошоците за негово сервисирање.
„Време е да се преземе акција“, рече Георгиева, нагласувајќи дека за ова е потребна политичка храброст.
Таа изјави дека војните и прекините во снабдувањето со нафта ја поттикнаа инфлацијата и доведоа до зголемување на трошоците за задолжување за владите.
Георгиева им порача на развиените економии дека треба да го намалат нивото на јавен долг и да дадат приоритет на фискалната консолидација, додека централните банки треба да продолжат да го исполнуваат својот мандат за зачувување на ценовната стабилност.
„Ова се политички тешки чекори, но неопходни“, рече директорката на ММФ.
Јавниот долг на Соединетите Американски Држави надмина 40 трилиони долари и се дуплираше за приближно десет години. Зголемените трошоци за задолжување претставуваат дополнителен товар врз јавните финансии на САД.
Георгиева оцени дека ситуацијата во Велика Британија не е значително различна од ситуацијата во другите големи развиени економии. Според најновите бројки, задолжувањето на британската влада во август изнесуваше 18,3 милијарди фунти, додека трошоците за камата на долгот беа највисоки за август откако започна месечното следење во 1997 година.
Зборувајќи за можното влијание на вештачката интелигенција врз финансиската стабилност, Георгиева предупреди дека поголем број случаи во кои системите за вештачка интелигенција дејствуваат непредвидливо би можеле да претставуваат значителен ризик за глобалниот финансиски систем.
Таа изјави дека светската економија во моментов е обликувана од две спротивставени сили – енергетскиот шок предизвикан од прекини во снабдувањето и силниот бран инвестиции во развојот на вештачката интелигенција.
Според неа, трајната нормализација на снабдувањето со енергија од земјите од Персискиот Залив би бил важен чекор кон стабилизирање на глобалната економија, но, како што изјави, тоа сè уште не се случило, пренесува РТВ,
Фото Економија и бизнис
