Министерството за здравство во Хрватска донесе одлука според која државјаните на трети земји од визниот режим ќе мора да се подложат на здравствен преглед за откривање на акутни и хронични заразни болести при продолжување на нивниот привремен престој во Република Хрватска и, во зависност од нивниот статус на вакцинација, доколку е потребно да се вакцинираат.
Одлуката е донесена за заштита на интересите на јавното здравје и се однесува на државјаните на земјите на кои им е потребна виза за влез во Хрватска, односно Шенген зоната. Меѓу нив се, на пример, државјани на Индија, Непал, Бангладеш, Пакистан, Филипините и Египет на кои им е одобрен привремен престој во Хрватска и бараат негово продолжување.
Здравствениот преглед ќе се спроведе во јавните здравствени установи според нивното место на живеење или во Хрватскиот институт за јавно здравје, во рок од 90 дена пред поднесување на барање за продолжување на привремениот престој. Странските работници ќе доаѓаат на преглед врз основа на упат пополнет од нивниот работодавач.
Прегледот вклучува епидемиолошка анамнеза, физички преглед и утврдување на статусот на вакцинација, и мора да исклучи активна туберкулоза, носителство на бактерии кои предизвикуваат тифус и паратифус, како и инфекција со ХИВ, хепатитис Б и хепатитис Ц. Доколку наодите потврдат заразна болест или покренат сомневање за друга болест што претставува ризик за јавното здравје, лицето ќе биде упатено на дополнителна дијагностика и третман.
Одлуката, исто така, пропишува дополнителна вакцинација на државјани на трети земји под 35 години кои немаат доказ за пропишаната вакцинација против мали сипаници, детска парализа, дифтерија и тетанус. Државјаните на трети земји вработени во здравството и во системот за здравствена и социјална заштита, исто така, мора да бидат вакцинирани против хепатитис Б.
По прегледот, ќе се издаде сертификат, кој државјанинот на трета земја ќе мора да го чува во текот на целиот престој во Хрватска и да го презентира по барање на овластен инспектор на Државниот инспекторат, службеник на Министерството за внатрешни работи или за време на кој било здравствен преглед, пренесува Тпортал.
Фото Економија и бизнис
