Економија
Индија ќе ги намали царините за увоз на европски автомобили
26.01.2026
Индија ќе ги намали царините за европски автомобили од 110% на 40% со новиот трговски договор со Европската Унија. Царинските давачки би биле пониски за ограничен број европски автомобили што чинат повеќе од 15.000 евра. Намалувањето на царините, би се однесувале само на автомобили со мотори со внатрешно согорување.
Индија планира да ги намали царините за автомобили увезени од Европската Унија, изјавија извори за Ројтерс. Ова е најголемото отворање досега на огромниот пазар на Индија според договорот за слободна трговија меѓу ЕУ и Индија, кој би можел да биде склучен уште во вторник.
Владата на индискиот премиер Нарендра Моди се согласи со ЕУ веднаш да ги намали даноците за ограничен број автомобили со увозна цена поголема од 15.000 евра, изјавија за Ројтерс два извори запознаени со преговорите. Стапката на крајот ќе биде дополнително намалена на само 10%. Таквиот договор би им го олеснил пристапот на европските производители на автомобили како „Фолксваген“, „Мерцедес-Бенц“ и „БМВ“ на индискиот пазар.
Намалувањето на царините од 40 проценти првично би се однесувало на околу 200.000 автомобили со мотори со внатрешно согорување годишно, изјави еден од изворите, но таа бројка би можела да се промени. Во меѓувреме, електричните автомобили ќе бидат исклучени од намалувањето на увозните давачки во првите пет години. Од Индија се очекува да ги заштити инвестициите на домашните компании. По пет години, се очекува електричните возила да имаат корист од слични намалувања на царините.
Индија е трет по големина пазар на автомобили во светот по продажба, зад САД и Кина. Досега, домашната автомобилска индустрија беше меѓу најзаштитените, со царини кои се движат од 70 до 110 проценти за увезените автомобили.
Се очекува Индија и Европската Унија да ги завршат долготрајните преговори за договор за слободна трговија во вторник. И ЕУ и Индија го опишаа претстојниот договор како „договор на сите договори“.
Трговската размена меѓу Индија и ЕУ изнесуваше 115 милијарди евра во фискалната година до март 2025 година, што ја прави ЕУ еден од најголемите трговски партнери на Индија. Индија е четвртата најголема и најбрзо растечка економија во светот, со БДП од 4,13 трилиони долари (речиси 3,5 трилиони евра) во 2025 година, претекнувајќи ја Јапонија оваа година.
Фото Економија и бизнис