Вести
Проектот за локална и регионална конкурентност финансиран од ЕУ ги презентираше своите резултати
13.04.2023г.
Денес беше одбележано завршувањето на последната фаза од Проектот за локална и регионална конкурентност финансиран од ЕУ, со настан кој се одржа во винарската визба „Лазар“ во општина Росоман. Беа презентирани резултатите и успешните приказни од проектот финансиран од ЕУ, а поздравни обраќања имаа Џулијан Васало, вршител на должност во Делегацијата на Европската Унија и Фатмир Битиќи, вицепремиер задолжен за економски прашања и инвестиции.
Проектот за локална и регионална конкурентност (ПЛРК) е финансиран со 18 милиони евра од Европската Унија и се спроведува во партнерство со Светска банка и Владата на Северна Македонија. Неговата главна цел беше зајакнување на туристичкиот сектор во земјата.
ПЛРК се состоеше од четири компоненти: Техничка помош за развој на туризмот, зајакнување на управувањето со дестинацијата и поволното опкружување, инвестиции во туристичка инфраструктура и поврзувања во дестинациите и зајакнување на управувањето со проектот.
Со средства од Европската Унија, проектот поддржа 57 потпроекти низ целата земја, од кои 14 беа презентирани на денешниот настан. Во рамките на овој проект се изврши конзервација и реставрација на Домот на АРМ во Битола и 43 дуќани во Старата скопска чаршија. Постојното бачило е рехабилитирано и претворено во Еко ресторан Ски Центар Маврово, изградени се 14 општински објекти за спорт и рекреација, реконструирани се 15 општински простори и објекти, реконструирани и опремени се 6 хорека и 12 сместувачки капацитети, а изградени и реновирани се околу 120 хотелски соби.
Во однос на инфраструктурата, реконструирани се повеќе од 10 километри пристапни и регионални патишта, реконструирани се пешачки патеки во повеќе од 5 општини, а изградени и подобрени се повеќе од 50 километри велосипедски патеки.
Конечната евалуација на проектот ПЛРК потврди дека поддршката обезбедена на општините, микро, малите и средните претпријатија и здруженија, имаше позитивен ефект врз локалната туристичка економија и охрабри нови работни места.