Цените на горивата во Европа нагло пораснаа по нападите на САД и Израел врз Иран и набрзо го достигнаа врвот. По прекинот на нападите цениоте се намалија, но дизелот и бензинот сè уште се значително поскапи отколку пред нападот, објавува „Еуроњуз“.
Цените на горивата во Европа остануваат во просек за 12 проценти повисоки од почетокот на нападите на САД и Израел врз Иран, и покрај кревкото примирје.
Врз основа на неделниот билтен за нафта на Европската комисија, Euronews Business ги анализираше промените во цените на горивата низ Европа, споредувајќи ги цените на 23 февруари и 20 април 2026 година.
Во тој период, просечната цена на бензинот во ЕУ (Euro-super 95) се зголеми од 1,64 евра на 1,83 евра за литар или зголемување од 12 проценти.
Белгија, Чешка и Бугарија забележаа најголем раст, по 22 проценти. Меѓу четирите најголеми економии на ЕУ, Франција имаше најголем скок од 18 проценти, по што следува Германија со 15 проценти. Италија (седум проценти) и Шпанија (три проценти) имаа поумерен раст. Во Малта, цената на бензинот не се промени.
Во Грција, растот беше 17 проценти, додека Финска и Данска пораснаа за по 14 проценти. Унгарија забележа раст од 13 проценти, Холандија 11 проценти и Ирска 10 проценти. Овие промени се изразени во евра, така што разликите во девизниот курс можеа да влијаат на резултатите во земјите надвор од еврозоната.
Цените на дизелот пораснаа уште поостро. Просечната цена на дизелот во ЕУ се зголеми од 1,59 евра на 2,01 евра за литар – зголемување од 26 проценти, повеќе од двојно од бензинот.
Бугарија забележа најголем скок од 43 проценти. Франција (36 проценти), Естонија (35 проценти) и Белгија (33 проценти) имаа раст од најмалку една третина. Зголемувањето на цените на дизелот надмина 30 проценти во Кипар, Хрватска и Латвија.
Меѓу големите економии, Франција е втора најбрзорастечка со 36 проценти. За разлика од бензинот, Шпанија забележа раст од 27 проценти, над просекот на ЕУ. Италија имаше раст од 24 проценти, а Германија 23 проценти.
Немаше зголемување на цените на дизелот во Малта. Најнизок раст е забележан во Унгарија и Романија (по 13 проценти), како и во Полска (15 проценти).
На 20 април, Холандија има највисока цена на бензинот во Европа – 2,28 евра за литар. Следат Данска (2,22), Германија (2,11), Грција (2,03) и Франција (2,02), сите над две евра.
Малта има најевтин бензин (1,34 евра), по што следуваат Полска (1,41) и Бугарија (1,47). Шпанија е четврта најевтина со 1,52 евра.
Холандија, исто така, води во однос на цените на дизелот, со 2,30 евра за литар. Следат Финска (2,25), Франција (2,24), Данска (2,22) и Белгија (2,19).
Франција, Германија (2,13) и Италија (2,11) се близу до врвот меѓу големите економии. Шпанија е единствената голема економија под просекот на ЕУ кога станува збор за цените на дизелот.
Малта се издвојува со најниска цена на дизелот од 1,21 евра за литар, додека следната најниска цена е во Полска – 1,64 евра.
Неделните податоци од почетокот на 2026 година покажуваат како конфликтот ги зголеми цените на горивата низ цела ЕУ и во четирите најголеми економии, пренесува Еуроњуз Србија.
Фото Економија и бизнис
