Помалите аеродроми во Европа би можеле да се соочат со сериозни проблеми со преживување доколку недостигот на гориво за авиони, предизвикан од кризата на Блискиот Исток, доведе до широко распространети откажувања на авио линии, предупреди денес здружението на Советот на аеродроми на Европа.

Авиокомпаниите во моментов немаат проблеми со снабдувањето за вообичаениот период од четири до шест недели, но војната меѓу САД и Израел против Иран и ефикасното затворање на Ормускиот теснец ја удвоија цената на горивото за авиони, што веќе ги натера некои превозници да откажат летови.

Советот на аеродромите на Европа објави, дека регионалните аеродроми се најизложени и се соочуваат со „егзистенцијална закана“ доколку авиокомпаниите го намалат капацитетот и ги зголемат цените на билетите, бидејќи побарувачката на тие линии е почувствителна на цените.

Генералниот директор на таа организација, Оливие Жанкове, изјави дека помалите аеродроми сè уште не се опоравиле од последиците од пандемијата Ковид-19, бидејќи сообраќајот е сè уште околу 30 проценти под нивото од 2019 година, додека поголемите аеродроми веќе бележат закрепнување и раст.

„Сегашното ниво на цените на горивата и можноста за нова криза со трошоците за живот значат дека многу регионални аеродроми низ Европа ќе се соочат и со понуда и со побарувачка. За нив, ова не е ништо помалку од егзистенцијална закана“, рече Жанкове.

Здружението, исто така, предупредува дека ситуацијата може дополнително да се влоши со целосното спроведување на системот за влез и излез од Европската Унија, кој предвидува задолжително обезбедување биометриски податоци за граѓаните на трети земји, со повик системот да може привремено да се суспендира доколку има големи толпи.

Во исто време, шефот на глобалната авијациска асоцијација IATA, Вили Волш, оцени дека кризата засега не влијае на побарувачката за летови, но предупреди дека евентуалниот недостиг на гориво прво ќе влијае на Азија, а потоа и на Европа, и дека рационализацијата може да доведе до откажување на одредени летови, пренесува Политика.

Фото Економија и бизнис