Шпанија и Франција се подготвуваат за уште еден можен топлотен бран што би можел да донесе температури до 44 степени Целзиусови во наредните денови, додека податоците покажуваат дека екстремната топлина во јуни предизвикала повеќе од 2.000 предвремени смртни случаи.
Шпанската државна метеоролошка агенција Аемет објави дека од сабота, сув и многу топол воздух ќе го покрие поголемиот дел од земјата, со продолжени високи температури. Во некои делови од југоисточна Шпанија, во вторник се очекуваат температури помеѓу 42 и 44 степени.
„Температурите ќе почнат да се зголемуваат во текот на викендот и не можеме да исклучиме уште еден топлотен бран“, изјави портпаролот на Аемет, Рубен дел Кампо.
Агенцијата предупредува дека високите температури следната недела би можеле дополнително да го зголемат ризикот од шумски пожари, а на постарите лица и граѓаните со кардиоваскуларни заболувања им се препорачува да бидат особено внимателни во најжешкиот дел од денот.
Според податоците на Aemet, јуни оваа година беше втор најтопол месец откако се забележани рекорди на температура, веднаш зад јуни 2025 година, со просечна температура дури 3,2 степени над нормалата.
Прелиминарните бројки покажуваат дека во Шпанија и Франција, поради екстремната топлина во јуни, починале околу 1.000 луѓе во секоја земја.
Според шпанскиот систем за следење на смртноста, во јуни се регистрирани дополнителни 1.029 смртни случаи поради високите температури.
Француската агенција за јавно здравје соопшти дека 10-дневниот топлотен бран на крајот на јуни предизвикал околу 1.000 дополнителни смртни случаи помеѓу 24 и 28 јуни, иако конечните бројки сè уште не се објавени.
Директорот на болниците во парискиот регион, Николас Ревел, изјави дека не очекува бројот на жртви да достигне 15.000, колку што беше бројката за време на катастрофалниот топлотен бран во 2003 година.
Во Германија оваа година, повеќе од 800 луѓе починаа како резултат на топлината, а пред неодамнешниот излив на рекордна топлина, објави во четврток Институтот Роберт Кох (RKI). Бројката сигурно ќе биде поголема во следниот извештај, предупреди RKI.
Институтот процени дека до 21 јуни, околу 500 луѓе над 85 години, околу 190 од возрасната група од 75-84 години, 80 на возраст меѓу 65-74 години и четириесет лица под 65 години починале од последиците на топлината.
Просечната дневна температура во неделата од 15 до 21 јуни била 21,1 степени, што е над прагот за зголемена стапка на смртност, објавија медиумите во Европа.
Фото Економија и бизнис
