Администрацијата на Трамп во вторник предложи воведување дополнителни тарифи од 10 или 12,5 проценти за увоз од 60 економии, вклучувајќи ја и ЕУ, поради, како што рече, неуспех во ограничувањето на трговијата со стоки произведени со принудна работа, што ѝ штети на американската трговија.

Предлогот на Канцеларијата на трговскиот претставник на САД (USTR) е најновото откритие од истрагата за нефер трговски практики според Член 301, кое беше објавено додека администрацијата на Трамп се обидува да ги врати своите вонредни тарифи, кои беа поништени од Врховниот суд на САД во февруари, пишува Ројтерс.

USTR објави дека одлучила да воведе тарифи од 10 проценти за увоз од Канада, Еквадор, Европската Унија, Индонезија, Мексико, Пакистан, Аргентина, Бангладеш, Камбоџа, Ел Салвадор, Гватемала, Индонезија, Малезија, Тајван и Велика Британија.

Агенцијата, исто така, соопшти дека ќе воведе дополнителни тарифи од 12,5 проценти за преостанатите 45 земји што ги истражува.

„Неуспехот на нашите најважни трговски партнери да се справат со увозот на стоки произведени со принудна работа е неприфатлив. Тоа создава динамика во која американските работници се принудени да се натпреваруваат глобално на нееднакво поле за игра“, рече трговскиот претставник на САД, Џејмисон Грир.

Објавата доаѓа пред истекот на привремената царина од 10 проценти на 24 јули, воведена од администрацијата на Трамп на 20 февруари, кога Врховниот суд ги поништи царините на американскиот претседател според Законот за меѓународни економски овластувања во вонредни ситуации, пренесува Н1.

Фото Економија и бизнис