Светските залихи на нафта се намалиле за околу 4,8 милиони барели дневно во периодот од 1 март до 25 април. Околу 60 проценти од тој пад се однесува на суровата нафта, додека остатокот се однесува на нафтените деривати, покажуваат проценките на банката Морган Стенли.

Ова е значително поголем пад од претходното рекордно квартално намалување претходно регистрирано од Меѓународната агенција за енергија (ИЕА). Глобалните залихи на нафта сега се близу до најниското ниво од 2018 година,  проценуваат од Голдман Сакс.

Раководителот на истражувањето на пазарот на суровини во JPMorgan Chase, Наташа Канева, предупреди дека веќе на почетокот на следниот месец, земјите од ОЕЦД би можеле да се соочат со логистички прекини на пазарот на нафта, додека залихите би можеле да паднат на оперативен минимум до септември. Тоа е нивото под кое нафтоводите, терминалите и складиштата повеќе не можат да функционираат нормално.

Темпото на намалување на залихите можеби малку се забавило во последните денови, делумно поради послабата побарувачка од Кина, која ослободи дополнителни количини нафта за други пазари.

Аналитичарите се особено загрижени за ситуацијата во азиските земји како што се Индонезија, Виетнам, Пакистан и Филипините, кои би можеле да се соочат со критично ниско ниво на понуда во рок од еден месец. Во Европа, во исто време, залихите за гориво за авијација брзо се намалуваат пред почетокот на летната туристичка сезона, а аналитичарите проценуваат дека критичното ниво би можело да се достигне веќе во јуни, пренесува Бизнис.рс.

Фото Економија и бизнис