Повеќе од 100 организации за човекови права од 15 европски земји ќе протестираат против забрзаниот развој на енергетски интензивните центри за податоци, барајќи итен мораториум на нови големи проекти сè додека не се воспостават појасни правила за нивно регулирање.

По изборите за Конгресот во САД, европските активисти го изразуваат своето противење на проширувањето на центрите за податоци на европскиот континент.

Протестите наречени „Стоп на валканите центри за податоци“ ќе се одржат на 6 и 7 ноември, а акциите се планирани во Ирска, Полска, Данска, Финска, Шпанија, Холандија, Франција и Обединетото Кралство.

Организаторите наведуваат дека протестите се одржуваат „поради растечката загриженост за влијанието на проширувањето на центрите за податоци врз локалните заедници, јавната инфраструктура, користењето на земјиштето, водата и енергијата, домувањето, работните места и трошоците за живот“.

Граѓаните во Соединетите Американски Држави (САД), како и многумина во Европа, се загрижени за влијанието на овие проекти врз секојдневниот живот, вклучително и зголемувањето на цените на енергијата и дополнителниот притисок врз веќе ограничените водни ресурси поради високата потрошувачка на вода и електрична енергија.

Жителите што живеат во близина на центрите за податоци се исто така загрижени за нивното влијание врз животната средина, вклучувајќи го загадувањето на воздухот предизвикано од резервните генератори, густиот градежен сообраќај, непривлечниот изглед на објектите и постојаната бучава од машините што работат 24 часа на ден.

Демонстрантите ги повикуваат политичките лидери да воведат мораториум за големи центри за податоци на европско, национално и локално ниво, за да се разгледаат нивните загрижености и темелно да се анализираат влијанијата од ваквите проекти.

Европа ја забрзува изградбата на центри за податоци во обид да ги стигне САД и Кина во трката за развој и примена на технологии за вештачка интелигенција, пренесува Вијести.ба.

Фото Економија и бизнис