Забраната на САД за увоз на стока од Канада во вредност од околу една милијарда долари, која опфаќа алкохолни пијалаци, млечни производи и моторни возила, денеска официјално стапи во сила откако американскиот претседател Доналд Трамп потпиша соодветна извршна наредба.

Американскиот трговски претставник Џејмисон Грир во писмено соопштение изјави дека мерката претставува директен одговор на дискриминаторскиот однос на Канада кон клучниот американски извоз.

Иако ова ограничување на стока во вредност од речиси една милијарда долари нема да има значително економско влијание во споредба со вкупната годишна билатерална трговска размена од 880 милијарди долари, овој потег означува нова фаза на ескалација во трговскиот спор со Канада, која е долгогодишен сојузник и главен партнер на САД.

Забраната е дел од серијата заемни трговски мерки меѓу двете соседни земји. Американската администрација уште во јули најави дека ќе воведе царини од 50 отсто за одредени канадски стоки, повторно обвинувајќи ја Отава за нефер практики кон американските производи. Тие царини стапија во сила на 22 август.

Како одговор на тоа, канадската влада воведе царини во висина од 15, 25 и 50 отсто за одредени американски производи, кои стапија во сила на 8 септември.