Кинеското Министерство за трговија им забрани на домашните организации и поединци да работат со седум американски субјекти, ги заостри контролите врз извозот на беспилотни летала и сродна технологија наменета за Соединетите Американски Држави и го ограничи учеството на американските агенции во задолжителните инспекции на кинеските фабрики како дел од процесот на сертификација.

Пекинг изјави дека мерките се одговор на неодамнешните ограничувања на САД што влијаат врз кинеските телекомуникациски оператори, лабораториите за тестирање, беспилотните летала, потрошувачките рутери, подморските кабли, напредната роботска опрема и инверторите за напојување.

Вашингтон минатата недела додаде повеќе од 40 кинески субјекти на листата според Законот за спречување на принудна работа на Ујгурите.

Овие потези претставуваат најнова ескалација на тензиите во трговијата и технологијата меѓу САД и Кина. Вашингтон ги заострува ограничувањата за кинескиот пристап до американската технологија и пазари, додека Пекинг одговара со ограничувања на извозот и санкции против избрани американски субјекти.

Администрацијата на претседателот на Соединетите Американски Држави, Доналд Трамп, подготвува забрана за увоз на нови модели на кинески компоненти за центри за обработка на податоци, со цел да се заштити инфраструктурата што е основа на развојот на вештачката интелигенција, објавија денес американските медиуми.

Според изворите, Федералната комисија за комуникации на САД (FCC), која го регулира телекомуникацискиот сектор во САД, работи на регулатива со која би се забранил увозот на нови кинески оптички примопредаватели, уреди што овозможуваат пренос на податоци преку оптички кабли во центрите за обработка на податоци со голема брзина.

Мерката има за цел да ги спречи кинеските компании да крадат податоци, да инсталираат малициозен софтвер или да се мешаат во американските центри за податоци во кои се сместени чипови за обука и водење модели на вештачка интелигенција, пренесува Политика.

Фото Економија и бизнис