Најмалку 900 автомобили чекале до 36 часа гориво во колона од пет километри на автопат во Чита, Сибир, бидејќи Русија се соочила со акутен недостиг на бензин по украинските напади.
Цените на горивата скокнаа, а бензинските пумпи беа принудени да ги рационализираат залихите во најмалку 55 од 83-те региони на Русија.
Нападите ја разбија илузијата за нормалност за која Москва напорно работеше, па дури и рускиот претседател Владимир Путин призна дека тие имаат проблеми.
Заменик-гувернерот на Централната банка на Русија, Алексеј Заботкин, изјави дека оваа институција го смета сегашното зголемување на цените на бензинот и дизелот за привремен шок од страната на понудата.
Заботкин процени дека неговото влијание врз монетарната политика ќе биде ограничено доколку ситуацијата се стабилизира, пренесува руски бизнис медиум.
Заботкин изјави дека руската влада презема мерки за да се осигури дека нарушувањата на пазарот на горива се од привремена природа, додавајќи дека во тој случај нивното влијание би било ограничено првенствено на инфлаторните очекувања на граѓаните и економијата.
Гувернерката на Централната банка на Русија, Елвира Набиулина, претходно предупреди дека зголемувањето на цената на бензинот и дизелот влијае и на инфлацијата и на инфлаторните очекувања, бидејќи горивото е една од најчувствителните ставки за домаќинствата и компаниите.
Кина почна да испорачува гориво за Русија поради сè поизразените проблеми со снабдувањето предизвикани од нападите со украински беспилотни летала врз руските рафинерии за нафта.
Според руските медиуми, на преминот во последните денови се формирале долги редици цистерни што транспортираат гориво од Кина, што ги натерало властите на Забајкалскиот регион да се обидат да обезбедат приоритетен премин за овој вид товар.
Според весникот „Москва Тајмс“, на 3 јули, гувернерот на Забајкалскиот регион, Александар Осипов, потпишал декрет со кој привремено ќе им се забрани на сите камиони, освен на оние што транспортираат гориво, да го користат граничниот премин Забајкалск. Како објаснување, беше наведено дека цистерните со гориво чекале со часови во истите редици како и другите товарни возила, пренесуваат медиумите во регионот.
Фото Економија и бизнис
