Експлозијата на технологијата на вештачката интелигенција во САД иницира и градежна активност, создава нови работни места, ги зголемува приходите на локалните самоуправи и ја зголемува вредноста на акциите на берзите.
Според анализата на Волстрит џурнал, вештачката интелигенција стана еден од најважните фактори во економскиот раст на Соединетите Американски Држави. Сепак, она што денес е извор на сила, утре може да стане слабост ако инвестициите се забават или пазарите престанат да го финансираат овој бум со исто темпо.
Комбинацијата од инвестиции во инфраструктура и порастот на берзанските индекси поттикнати од трендот на вештачката интелигенција е одговорна за околу една третина од неодамнешниот економски раст во Соединетите Американски Држави, смета Мајкл Пирс, економист во „Оксфорд економикс“.
Инвестициите директно поврзани со вештачката интелигенција придонеле за речиси една четвртина од вкупниот раст на БДП во последниот период. Развојот на центри за податоци создава побарувачка не само за процесори, туку и за земјиште, градежни материјали, специјализиран персонал, системи за ладење и резервни генератори.
„Во голема мера, сегашната економија е водена од вештачка интелигенција“, истакнува Џонатан Милар, економист во Барклис банка.
Друг главен механизам за поддршка на економијата поминува низ Вол Стрит. Зголемувањето на вредноста на производителите на полупроводници и другите компании што се сметаат за „победници на револуцијата на вештачката интелигенција“ значително го зголеми нето богатството на американските домаќинства.
Во првиот квартал од 2026 година, нето богатството на американските домаќинства достигна рекордни 174 трилиони долари, што е за 13 трилиони долари повеќе во однос на претходната година, според податоците на Федералните резерви. Најголемиот дел од овој скок доаѓа од порастот на цените на акциите. Кога вредноста на инвестициските портфолија се зголемува, потрошувачите – особено оние од повисоките класи, се посклони да трошат повеќе.
Сепак, секој долар инвестиран во вештачка интелигенција не се претвора автоматски во раст на американското производство. Голем дел од опремата на центрите за податоци, како што се мемориските чипови и електронските компоненти, се увезува.
Во исто време, огромната побарувачка ги зголеми цените на чиповите, што директно се пренесува на потрошувачите, пренесува Еуроњуз Србија.
Фото Економија и бизнис
