Најновата епидемија на редок сој на вирусот ебола во Демократска Република Конго (ДР Конго) и Уганда поттикна голем број земји да воведат мерки за спречување на ширењето на болеста.
Светската здравствена организација (СЗО) регистрираше 220 сомнителни смртни случаи и 900 сомнителни инфекции со смртоносниот сој во ДР Конго откако Киншаса прогласи епидемија на 15 мај. Пет случаи и еден смртен случај се потврдени во Уганда.
Минатата недела, Обединетите нации ја зголемија проценката на ризикот во ДР Конго од висока на многу висока на национално ниво, но глобалниот ризик сè уште се смета за низок.
Неколку земји објавија забрани за патување и привремени гранични мерки за да се спречи ширењето на новиот сој на вирусот.
Оваа недела, Министерството за транспорт и врски на ДР Конго ги суспендираше сите летови до и од Бунија на истокот од земјата за да се обиде да го спречи ширењето на еболата. Здравствената зона Бунија е една од 11-те погодени области во земјата.
Канада и Бахамите привремено го забранија влезот на жителите на ДР Конго, Уганда и Јужен Судан.
Жителите на овие земји нема да можат да патуваат во Канада 90 дена почнувајќи од среда, објави владата. Канадските граѓани, лицата со постојан престој и странските државјани кои престојувале во погодените области во последните недели ќе мора да бидат во карантин 21 ден почнувајќи од 30 мај, дури и ако немаат симптоми, објави Канадската агенција за јавно здравје.
Соединетите Американски Држави минатата недела го забранија влезот на сите странски државјани кои биле во ДР Конго, Уганда или Јужен Судан во претходните 21 ден. Американските центри за контрола и превенција на болести (CDC) во петокот ја проширија забраната на носителите на зелени карти кои престојувале во тие земји.
Индија ги зајакна здравствените контроли на главните меѓународни аеродроми и издаде препораки до граѓаните да избегнуваат патувања во ДР Конго, Уганда и Јужен Судан.
Тајланд објави дека патниците од ДР Конго и Уганда ќе можат да влезат во земјата само преку аеродромот Суварнабхуми во Бангкок, по негативен резултат од скринингот при пристигнувањето.
Во понеделник, мексиканското Министерство за здравство, исто така, објави зголемени контроли на аеродромите.
Смртоносна форма на вирусот ебола што предизвикува тешка вирусна хеморагична треска, се пренесува преку близок физички контакт со крвта или телесните течности на заразено или починато лице, како и преку контаминирани предмети. Затоа мерките за ограничување на контактот се клучни за борба против ширењето на вирусот, пренесува Н1.
Фото Економија и бизнис
