Неколку улици во Менхетен во Њујорк, беа евакуирани за време на шпицот во вторник наутро откако зграда во реновирање покажа знаци на уривање.

„Два потпорни столба се извиткаа, а подовите претрпеа повеќекратни пукнатини и вдлабнатини. Зградата останува нестабилна. Откако пристигнавме на местото на настанот, забележавме понатамошно движење на еден од ослабените столбови“, рече градоначалникот Зохран Мамдани на прес-конференција.

Инвеститорот на зградата инсистира дека „целата зграда не е во опасност од уривање“, одговарајќи на коментарите од портпаролот на противпожарната служба на градот Њујорк.

Во близина на терминалот Гранд Централ и седиштето на Обединетите нации, 37-катната зграда, некогаш дом на фармацевтскиот гигант, се претвора во луксузни станови како дел од голем проект за реконструкција.

Пожарникарите беа повикани откако почнаа да паѓаат тули, се вели во соопштението. „По пристигнувањето, екипите открија дека два столба се повлекле на 21-виот и 22-риот кат. Подовите се повлекле помеѓу 21-виот и 26-тиот кат“, соопшти противпожарната служба. Видеата споделени од градежните работници и видени од АФП покажуваат дека столбовите во зградата се свиткани.

Клифорд Џонсен, претставник на синдикатот на градежните работници, го критикуваше додавањето катови над постојната структура.

Зградата од речиси 120.000 квадратни метри, чие завршување е закажано за почетокот на 2027 година, ќе донесе околу 1.600 станови на пазарот за изнајмување, пренесуваат медиумите во светот.

Фото Економија и бизнис