Кошаркарите на Олимпијакос се првите финалисти во Евролигата откако попладнево во првото полуфинале го совладаа актуелниот европски првак Фенербахче со 79:61 (18:12; 15:12; 23:17 и 23:20).

Грчкиот претставник натпреварот го почна со одлична одбрана и противникот првите поени ги постигна по седум минути, а потоа и во вториот период Фенербахче шест минути мина без кош и на полувреме предноста беше 33:24.

На стартот од вториот дел Олимпијакос имаше серија од 11-0 и поведе со 44:24, сепак Фенербахче намали на девет негатива (48:39). Во последната четвртина Фенербахче со серија од 8-0 намали на 56:49, што беше најмала разлика, но немаше сили за пресврт.

Во текот на дуелот играчите на Олимпијакос имаа шут за три поени 11/27, додека Фенербахче слаби 8/36.

Најефикасен кај победникот беше Алек Пиетрус со 17 поени (без промашување), а кај Фенребахче Тарик Биберовиќ постигна 17 поени.

Во второто полуфинале од 20 часот играат Реал Мадрид против Валенсија.

извор МИА
фото: https://www.facebook.com/TheEuroLeague