Шпанија и Аргентина вечерва ќе се борат за најголемиот фудбалски трофеј, но финалето на Светското првенство на ФИФА 2026 ќе одлучи и како ќе се подели најголемиот финансиски фонд во историјата на турнирот.
ФИФА објави рекордни 871 милион долари за 48-те национални асоцијации што учествуваат на турнирот во САД, Канада и Мексико. Оваа сума ги опфаќа наградите поврзани со перформансите, подготовките и дополнителната поддршка за учесниците.
ФИФА првично додели 655 милиони долари како награди поврзани со резултатите, како дел од пакетот од 727 милиони долари објавен во декември 2025 година, што претставува зголемување од 50 отсто во споредба со Светското првенство во Катар во 2022 година. Шампионите ќе добијат 50 милиони долари, додека поразените финалисти ќе инкасираат 33 милиони долари. Разликата меѓу победата и поразот во денешното финале, оттука, вреди 17 милиони долари за соодветните национални федерации.
Рекордни исплати за учесниците
ФИФА ја зголеми својата поширока финансиска дистрибуција непосредно пред турнирот, повикувајќи се на комерцијалниот успех на проширениот натпревар. Парите за подготовка за секоја репрезентација беа зголемени од 1,5 на 2,5 милиони долари, додека гарантираната исплата за квалификација беше зголемена од девет на 10 милиони долари.
ФИФА додели и повеќе од 16 милиони долари за дополнителни придонеси за репрезентациите, вклучувајќи субвенции за трошоците на делегациите и зголемен број билети. Овие зголемувања го доведоа вкупниот износ што ќе се распредели меѓу 48-те учеснички асоцијации на 871 милион долари.
Финансиските награди им се исплаќаат на Кралската шпанска фудбалска федерација и на Аргентинската фудбалска асоцијација, а не директно на индивидуалните играчи. Колку од парите на крајот ќе стигнат до фудбалерите зависи од посебните договори за бонуси што се преговараат меѓу секоја репрезентација и нејзината национална федерација. Ниту една од федерациите не објави целосен преглед на бонусите што играчите би ги добиле за победа во финалето.
Секоја фаза носи финансиска награда
Според оригиналниот распоред за исплати на ФИФА врз основа на перформансите, репрезентациите што ќе завршеа меѓу 33-то и 48-мо место требаше да добијат по девет милиони долари. ФИФА подоцна ја зголеми гарантираната исплата за секоја квалификувана асоцијација на 10 милиони долари.
Репрезентациите што стигнаа до шеснаесетфиналето беа предвидени за 11 милиони долари, учесниците во осминафиналето добија по 15 милиони, а четвртфиналистите по 19 милиони долари. Четвртопласираната репрезентација ќе добие 27 милиони долари, додека третопласираната ќе инкасира 29 милиони долари. Стигнувањето до финалето затоа им гарантира на Шпанија и на Аргентина значително повеќе отколку на репрезентациите елиминирани во пораните фази од турнирот.
Клубовите, исто така, имаат корист
Финансиското влијание на Светското првенство се протега надвор од националните федерации. ФИФА раководи со Програма за корист на клубовите, со која ги компензира клубовите за ослободување на играчите за националните репрезентации.
Исплатите се пресметуваат делумно според бројот на денови што играчите ги поминуваат на турнирот и се распределуваат до клубовите што ги вработувале во соодветниот период. Финансирањето на програмата беше зголемено на рекордни 355 милиони долари за Светското првенство 2026, во споредба со приближно 209 милиони долари за турнирот во 2022 година.
Играчите од некои од најголемите клубови во Европа и во Јужна Америка ќе учествуваат во неделното финале, што значи дека финансиските придобивки ќе се прошират и до клубовите во Шпанија, Аргентина и во други земји.
Комерцијалната вредност далеку ја надминува наградата
Директните исплати од ФИФА претставуваат само дел од потенцијалната економска вредност што ја генерира победата на Светското првенство. Титулата може да ја зголеми спонзорската привлечност на федерацијата, побарувачката за брендирани производи (мерчандајз) и поширокиот комерцијален профил, додека националните асоцијации може да имаат и договори поврзани со резултатите со комерцијалните партнери.
За Аргентина, победата би обезбедила втора последователна титула и дополнително би ја зајакнала комерцијалната привлечност на репрезентацијата предводена од Лионел Меси. За Шпанија, првиот триумф на Светско првенство по 2010 година би ја издигнал новата генерација предводена од Ламин Јамал и би создал нови комерцијални можности за федерацијата и за нејзините спонзори.
Финалето ќе се игра денеска на стадионот „Њујорк Њу Џерси“ во Ист Ратерфорд, со почеток во 19:00 часот по Гринич (21 часот по македонско време).
извор МИА
