Европскиот комесар за внатрешни работи и миграција, Магнус Брунер, денес изјави дека Европската комисија, поради проблемите што ги имаат професионалните возачи од Западен Балкан со Системот за влез/излез (EES), им предложила на членовите на Унијата и на земјите од Западен Балкан да разговараат и да се договорат за долгорочни визи.

Брунер го кажа ова во интервју за Европскиот весник (ENR),  и ја наведе Хрватска како пример, која веќе го стори тоа и склучи договори со земјите од Западен Балкан за долгорочни визи.

Тој додаде дека ќе им предложи на земјите од Западен Балкан да разговараат и да склучат вакви договори со другите членки на Унијата.

„Тоа е моментално излезот. Земјите-членки можат да издаваат дозволи за престој, долгорочни визи, тоа е на земјите-членки да го сторат. И на долг рок, се обидуваме да најдеме решенија во новата визна политика. Затоа разговараме и со земјите-членки“, рече Брунер и додаде дека ова е важно и поради европските компании кои се исто така погодени од воведувањето на новиот систем.

„Правилото дека можете да останете во Европската Унија 90 дена во рок од 180 дена не е променето. Но, секако сега со системот EES знаеме кои се оние што го пречекоруваат дозволениот престој. И тоа е разликата. Сега системот покажува дали некој ќе остане повеќе од 90 дена. Европските компании се исто така засегнати, но се обидуваме да најдеме долгорочно решение. Потребно е време бидејќи земјите-членки мора да се договорат за правната основа за тоа, па затоа не можеме да го направиме тоа во следните недели или месеци“, рече Брунер.

Зборувајќи за системот EES, тој рече дека во првите осум месеци од неговата имплементација имало 110 милиони регистрации, од кои 45.000 биле одбиени поради лажни документи, како и 1.100 лица на кои им бил одбиен влез поради безбедносни проблеми, што претставува безбедносна закана за Европската Унија.

Фото Економија и бизнис